Самарқанд тумани давлат солиқ инспекция ва ички ишлар бўлими ходимлари ҳамкорлигида туманнинг Кулба маҳалласида ўтказилган текшириш тадбирида фуқаро Х.Б 20 та қути (1200 дона) пиротехника маҳсулотларини 400 минг сўмга сотаётгани аниқланди. Бу ҳақда «Дарё» мухбири Фарҳод Норбўтаев хабар бермоқда.
Х.Б пиротехника маҳсулотларини ушбу маҳаллада истиқомат қилувчи Ж.Т.дан ҳар бир қутисини 19 000 сўмдан харид қилганини билдирди. Ж.Т. эса пиротехника воситаларини маҳалладоши Д.Д.дан сотиб олганини маълум қилди. Д.Д. эса пиротехника маҳсулотларини ўз эҳтиёжи учун нотаниш фуқародан сотиб олганини, пулга муҳтожлиги боис уларни сотганлигини маълум қилди. Шунингдек, ёнидаги 2 қути (120 дона) пақилдоқни чиқариб берди.
Текшириш давомида Қирғизистон Республикасида ишлаб чиқарилган «Новий век» ва «Трения» номли жами 440 минг сўмлик жами 22 қути (1320 дона) пиротехника воситалари далилий ашё сифатида олиб қўйилди.
Айни кунларда Самарқанд вилоят давлат солиқ хизмати органлари ходимлари томонидан пиротехника маҳсулотлари савдосининг олдини олишга қаратилган кенг кўламли чора-тадбирлар амалга оширилмоқда.
Изоҳ (0)