Фарғона вилоятининг Бувайда туманида жойлашган Happy Land Childrens Academy нодавлат мактабгача таълим муассасаси биносининг бир қисми қулаб тушгани, мутасаддилар бу масалага ўз вақтида эътибор қаратмаётгани тўғрисида хабар берилган эди. «Дарё» мухбири Азизжон Эрматов воқеа жойида бўлиб, журналистик суриштирув ўтказди.
Happy Land Childrens Academy нодавлат мактабгача таълим муассасаси Фарғона вилояти Бувайда тумани Алимерган қишлоғида фуқаро Умиджон Солиевга тегишли намунавий турар жой биносида жойлашган. Айни пайтда ушбу боғчада 50 нафар бола тарбияланмоқда.
Боғча мудираси Мумтоза Турдиеванинг маълум қилишича, бино девори унга ёндош ҳудудда олиб борилаётган қурилиш ишлари сабаб қулаб тушган. Воқеа 30 ноябрь куни соат 18:00 лар атрофида содир бўлган. Бахтли тасодиф туфайли бу вақтда боғчада тарбияланувчилар бўлмаган ва ҳеч ким жабрланмаган.
Боғча биноси қисман қулаб тушгач, шу куннинг ўзида мудира бу ҳақида туман ҳокимлиги, прокуратура ва бошқа мутасадди идораларга мурожаат қилган. Бироқ, 3 кун давомида маҳаллий ҳокимлик мутасаддилари ҳам, коммунал хизматлар ва фавқулодда вазиятларга алоқадор ташкилотлар вакиллари ҳам бу воқеага эътибор қаратмаган.
Мазкур ҳолат бўйича «Дарё» интернет нашрида хабар берилгач, вилоят прокурори ўринбосари раҳбарлигида ишчи гуруҳ тузилиб, вазият жойида ўрганиб чиқилди.
Ўрганиш жараёнида маълум бўлишича, қисман қулаб тушган боғчага чегарадош ҳудуддан Бувайда тумани ҳокимининг 2018 йил 28 февраль кунги 444-сонли қарорига кўра фуқаро Эргашой Турсуновага мактабгача таълим муассасаси қуриш учун 4,5 сотих ер ажратиб берилган.
2018 йилнинг 1 майида мазкур ерда хусусий мактабгача таълим муассасаси қуриш учун «Қишлоққурилишлойиҳа» МЧЖ бош қидирув лойиҳа институтининг 12/05-18/46-17-сонли ижобий хулосаси олинган.
Мазкур объект учун «Фарғонаагролойиҳа» МЧЖ томонидан лойиҳа ҳужжатлари тайёрланиб, 24 май куни «Ўзгашклити» ДУК Фарғона филиали томонидан хулоса олинган. 14 август куни вилоят архитектура-қурилиш назорати давлат инспекцияси томонидан қурилиш-монтаж ишларини бажариш учун 1278-сонли рухсатнома берилган.
Жорий йилнинг 1 ноябрь куни қурилиш ишларини амалга ошириш учун Э.Турсунова раҳбарлигидаги «Мумтозмаҳалбегим зиё» оилавий корхонаси ва «Life универсал поинт» МЧЖ ўртасида 11-сонли шартнома тузилган. 17 ноябрь кунидан пойдевор учун ер қазиш ишлари бошланган.
3,7 метр чуқурликдаги ертўла қазиш жараёнида буюртмачи ва қурувчи томонидан «Ўзгашклити» ДУК Фарғона филиали мутахассислари белгилаб берган чегара чизиғига риоя этилмаган. Натижада қурилиш объекти ёнида жойлашган Happy Land Childrens Academy нодавлат мактабгача таълим муассасаси биносининг пойдевор ва девор қисмлари қулаб тушган.
Жорий йилнинг 7 декабрь куни Фарғона вилояти қурилиш соҳасида худудий назорат инспекцияси билан тузилган 583-сонли пудрат шартномасига асосан бинога етказилган зарар кўламига аниқлик киритилди. Айни пайтда боғча биносининг бузилган қисмида айбдор томон ҳисобидан қайта қурилиш-таъмирлаш ишлари амалга оширилмоқда.
Бувайда тумани мактабгача таълим бўлими раҳбари Севара Қурбонованинг маълум қилишича, туман ҳокими қарорига асосан фуқаро Э.Турсуновага ажратиб берилган 4,5 сотих ер майдонида 25 ўринли мактабгача таълим муассасаси қурилмоқда. Янги боғчанинг қурилиш-таъмирлаш ишларига давлат хусусий шерикчилиги асосида қарийб 1 миллиард сўм имтиёзли кредит маблағи ажратилган.
Бош давлат санитария врачи томонидан 2018 йил 27 апрель куни тасдиқланган Санитария қоидалари, нормалари ва гигиена нормативларида 1 нафар бола учун ички бинолар майдони 3,3 квадрат метр бўлиши белгиланган.
Давлат санитария-эпидемиология назорати маркази ва туман қурилиш бўлими мутахассислари томонидан берилган хулосага кўра, мактабгача таълим муассасаси қуришда 1 нафар бола учун 40 квадрат метр, 25 нафар бола учун 1000 квадрат метр жой талаб қилинади. Давлат хусусий шерикчилиги асосида қурилаётган янги боғча учун 450 квадрат метр ер майдони ажратилган.
Ўйлаймизки, мактабгача таълим вазирлиги давлат хусусий шерикчилиги асосида имтиёзли кредит эвазига бунёд этилаётган мазкур боғчанинг белгиланган давлат стандартлари ва талабларига мувофиқлигини эътибордан четда қолдирмайди.
Бундан ташқари, мактабгача таълим муассасаси қурилаётган объектда техника хавфсизлиги ва меҳнат муҳофазаси талабларига етарли даражада риоя этилмаяпти. Қурилиш ишлари олиб борилаётган ҳудуд чегараланмаган. Ертўла учун қазилган қарийб 4 метрлик чуқур атрофи ўраб олинмаган. Ваҳоланки, қурилиш ҳудудининг ёнида болалар боғчаси, аҳоли уйлари, маҳаллий йўл ва истироҳат боғи жойлашган. Маҳаллий ҳокимлик мутасаддилари бу ҳолатни ўз назоратига олишини кутамиз.
Изоҳ (0)