Ўтган йиллар давомида Оролнинг қуриган тубида саксовул ва бошқа шўрга чидамли ўсимликлардан иборат 490 минг гектарга яқин бутазорлар барпо этилди. Бу ҳақда ЎзА хабар бермоқда.
Ушбу ишларнинг тизимли давоми сифатида Орол денгизи тубидаги суви қуриган майдонларда шамол таъсирида юзага келадиган кучли қум, туз ва чанг бўронлари таъсирини камайтириш, қум кўчишини бартараф этиш, минтақада экологик ҳолатни яхшилаш мақсадида 2019—2021 йилларда жами 500 минг гектар, шундан 2019 йилда 100 минг, 2020 йилда 160 минг, 2021 йилда 240 минг гектар ҳимоя ўрмонзорлари барпо этиш белгиланган.
Ҳозирда ушбу тадбирга саксовул ўсимлигини экиш учун 200 га яқин турли техника, транспорт ва механизмлар, шунингдек, 2000 га яқин ўрмон хўжалиги ва бошқа ихтисослашган ходимлар жалб этилмоқда. 2 йўналиш бўйича, жумладан, Қораўзак туманидан «Ақпеткей» ҳамда Мўйноқ туманидан «Сургул-Ахантай» сингари Оролнинг қуриб қолган ҳудудларида экиш ишларига киришилмоқда.
Орол денгизининг қуриб қолган қисмидаги шўрланган ерларда илмий-тадқиқот ва амалий ишлар кўламини кенгайтириш, экотизимни яхшилаш ҳамда муносиб ҳаёт фаолиятини таъминлаш, тадқиқот ва инновацияларнинг илғор тажрибаларини жорий этиш мақсадида ташкил этилган Оролбўйи халқаро инновация маркази фаолияти йўлга қўйилмоқда. Марказга 45 гектарга яқин ер майдони ажратилди. Мазкур тажриба далаларида уруғчилик ва кўчатзорлар ташкил этишни 2019 йилдан бошлаб амалга ошириш белгиланган.
Изоҳ (0)