«Юқумли бўлмаган касалликларнинг профилактикасини, соғлом турмуш тарзини қўллаб-қувватлаш ва аҳолининг жисмоний фаоллиги даражасини ошириш чора-тадбирлари тўғрисида»ги Ўзбекистон Республикаси Президентининг қарорига кўра Ўзбекистонга олиб кирилувчи шакар, туз ва ёғлар миқдори юқори бўлган озиқ-овқат маҳсулотларга чеклов қўйилиши мумкин. Қарор матни ЎзАда келтирилган.
Бу қарорга «Ўзбекистон Республикаси Соғлиқни сақлаш вазирлиги манфаатдор вазирлик ва идоралар билан биргаликда таркибида ёғлар, туз ва қанд миқдори юқори бўлган озиқ-овқат маҳсулотларини олиб кириш, ишлаб чиқариш (тайёрлаш), сотиш ва истеъмолини чеклаш бўйича таклифлар кирицин» деган банд киритилган.
Ўзбекистон аҳолисининг соғлом турмуш тарзини қўллаб-қувватлаш ва жисмоний фаоллигини оширишни кўзда тутувчи мазкур қарорга кўра нафақат импорт қилинувчи, балки Ўзбекистонда ишлаб чиқарилувчи озиқ-овқат маҳсулотлари сифати ва таркибини ҳам назорат қилиш кучайтирилади.
Эндиликда Ўзбекистонга олиб кирилаётган, таркибида шакар миқдори меъёрдан кўп бўлган ширинликлар, қандолат маҳсулотлари, ширин ва алкоголсиз ичимликлар, сок ва нектарлар кабилар чекланиши мумкин.
Ортиқча ёғлар эса колбаса маҳсулотлари, соуслар, ёғ-мой маҳсулотларида, ортиқча тузлар эса консервалар, пишлоқлар, ёгурт ва майонез каби маҳсулотларда учрайди ва улар ҳам чекловлар доирасига тушади.
Таъкидлаш керакки, дунёнинг кўплаб давлатларида бундай маҳсулотларга алоҳида белгилар қўйилади ва уларнинг очиқ тарғиботи ҳамда рекламаси тақиқланган.
Изоҳ (0)