Ер шари аҳолиси тенг ярмининг бойликлари 8 кишининг қўлида сақланаётган экан. Мана шу 8 кишининг қўлида 3 миллиард 600 миллион киши эгалик қиладиган маблағ бор. Бу ҳақда Oxfam халқаро хайрия ташкилоти ўтказган тадқиқотлардан маълум бўлди. Бу ҳақда ЎзА хабар бермоқда.
Тадқиқотларга кўра, яқин 25 йил мобайнида биринчи триллионер пайдо бўлиши мумкин. Бу каби бойликни тугатиш учун бойвачча 27 аср мобайнида ҳар куни бир миллион доллардан сарфлаши керак бўлади.
2010 йилда дунё қашшоқларининг бойликлари миқдорича бойлик 43 кишининг қўлида сақланиши айтилган эди. Орадан ўтган олти йил мобайнида вазият кескин ўзгариб кетгани ойдинлашди. Oxfam’нинг маълумотига кўра, юзага келган тенгсизлик оқибатида юз миллионлаб кишилар қашшоқлик исканжасига тушиб қолган. Бу ўз навбатида жамиятни вайрон қилиб, демократияга путур етказади.
Бугунги кунда ҳар ўн кишининг еттитаси сўнгги 30 йилда даромад масаласида тенгсизлик кузатилаётган мамлакатларда истиқомат қилади. Бундан ташқари, хотин-қизларга эркаклар билан бир хил маош бермайдиган мамлакатлар ҳам бор. Бу каби тенгсизликка барҳам бериш учун яна 170 йил керак бўлади.
Таҳлилчиларнинг фикрича, ер юзи аҳолисининг 10 фоизи қашшоқликда, ҳар тўққизтасидан биттаси очликда кун кечирмоқда. 3 миллиард киши ҳаёт кечириш учун даромадга эга эмас.
Oxfam ҳисоботида айтилишича, бадавлат акционерларга пул бериш мақсадида йирик корпорациялар солиқлардан бўйин товламоқда, ходимларининг маошларини қисқартириб юбормоқда. Корпорацияларнинг солиқ тўламаслиги натижасида қашшоқ мамлакатлар бир йилда камида 100 миллиард доллар миқдорида зиён кўради. Бу маблағлар бугунги кунда мактабга бориш имкониятидан маҳрум 124 миллион болага таълим беришга етади ёки ҳар йили 6 миллион боланинг ўлимининг олди олинарди.
Кузатувчилар жаҳондаги фаровонлик даражасини таҳлил қилар экан, сўнгги олти йил давомида бойваччаларнинг бойликлари икки баробар кўпайган бўлса, қашшоқлар сони ошиб, улар янада қашшоқлашиб кетганини айтишмоқда.
Бугунги кунда жаҳонда 1 миллиард бола қашшоқликда яшайди. ЮНИСEФ маълумотига кўра, бир кунда ўртача 22 минг бола очлик туфайли вафот этади. 805 миллион киши озиқ-овқат маҳсулотларидан маҳрум бўлса, 750 миллион киши тоза ичимлик сувидан бебаҳра яшамоқда. Ҳар йили сув етишмаслиги, антисанитария ва гигиена ёмонлиги сабаб 842 минг киши вафот этади. Бу ҳар куни ўртача 2 минг 300 кишининг бевақт кўз юмишини англатади. Ер юзи аҳолисининг чорак қисми, тахминан 1 миллиард 600 миллион киши электр манбаидан маҳрумлигича қолмоқда.
Ер юзидаги қашшоқликни йўқотиш учун бир йилда 60 миллиард доллар керак бўлади. Жаҳон Озиқ-овқат дастурида таъкидланганидек, «Камбағаллар оч қолмоқда, уларнинг очлиги эса қашшоқликка сабаб бўлмоқда».
Очлик ер юзидаги ўлим ҳолатларининг асосидир. Очлик туфайли ОИТС, ОИТВ, безгак, сил касалликларни қўшиб ҳисоблагандан ҳам кўра кўпроқ инсонлар ҳаётдан кўз юммоқда.
Таҳлилчиларнинг фикрича, жаҳон молия институтлари турли мамлакатларни ҳеч қачон чиқиб бўлмайдиган қарз ботқоғига ботирмоқда. Ҳатто иқтисоди тараққий этган АҚШнинг ҳам қарзи шу йилнинг март ойида 21 триллион долларга етди. Жаҳондаги умумий қарз миқдори 152 триллион долларни ташкил қилади.
Жаҳон иқтисодиётида бойлик тўплашнинг энг осон тармоғи модалар дунёси ва савдо экани тан олинади. Бу тармоқда савдо айланмаси 1 триллион долларни ташкил қилади. Бу миллиардерлар даромадининг 15 фоизи демакдир.
Юқори технологиялар тармоғи эса иккинчи ўринда туради. Бу соҳадаги миллиардерларнинг даромади 989 миллиард доллар ёки умумий даромаднинг 14 фоизини ташкил қилади. Учинчи ўринда молиячилар туради. Уларнинг даромади 962 миллиард долларга тенг. Табиий бойликлар (нефть, энергетика, металл) соҳасидан тушадиган даромад 623 миллиард доллар бўлгани боис тўртинчи ўринга лойиқ кўрилди. Бешинчи ўринда турадиган автомобилсозликдан 561 миллиард доллар фойда кўрилади. Биринчи тўрт соҳа билан жаҳондаги миллиардерларнинг ярмидан кўпи шуғулланади.
Oxfam (Oxford Committee for Famine Relief) 1942 йилда оч қолганларга ёрдам бериш мақсадида Оксфордда ташкил этилган. Унинг мақсади – ер юзидаги қашшоқлик билан боғлиқ муаммога барҳам бериш ва адолатсизликка чек қўйишдан иборат. Халқаро ташкилот айни дамда 90 мамлакатдаги 17 та ташкилотни ўз атрофида бирлаштириб туради.
Изоҳ (0)