Қашқадарё вилоятининг Шаҳрисабз шаҳрида 7-синф ўқувчиси ўз жонига қасд қилишдан аввал хат ёзиб қолдирган, прокуратура ҳодисани ўрганмоқда. Turon24 воқеа тафсилотларини ўрганди.
Ўз жонига қасд қилган ўқувчининг исм-шарифи – Муҳаммад Шербобоев. Маълум бўлишича, воқеа хориждаги ва Ўзбекистондаги оммавий ахборот воситаларида ёзилганидек 28 ноябрь куни эмас, 27 ноябрь куни тушдан кейин содир бўлган. Қолаверса, марҳум лицейда эмас, балки Шаҳрисабз шаҳридаги 1-сонли ихтисослаштирилган умумтаълим мактаб-интернатида аниқ фанлар йўналишида таҳсил олган.
«27 ноябрь куни ўқувчимиз Муҳаммад Шербобоевнинг онаси Машҳура Ҳусанова 1- ва 3-соатлардаги алгебра ва геометрия дарсларига кириб, ўқитувчининг дарс ўтиш жараёнини кузатди, – дейди ўзини 7-«А»синф раҳбари дея таништирган Алишер Ёрбобоев. – Ўқитувчи Бунёд Тошевнинг дарс ўтиши М.Ҳусановага маъқул келди. Дарс якунида ўқитувчининг дарс ўтишидан қониқиш ҳосил қилганини айтди. Аммо Муҳаммаднинг "тўрт" баҳо олганидан қониқмаганини ва ўғли «беш»га ўқишини хоҳлашини билдирди.
Математика фани ўқитувчиси Бунёд Тошевнинг айтишича, 27 ноябрь куни алгебра ва геометрия дарсларига ҳақиқатан ҳам Муҳаммаднинг онаси кириб, ўғлининг ўқишини кузатиш мақсадида келганини билдирган.
«Муҳаммаднинг онаси ҳам ўқитувчи экан. Шунинг учун дарс ўтиш жараёнимни кузатиш ниятида рухсат сўради, – дейди математика фани ўқитувчиси Бунёд Тошев. – Онаси келгани сабабли дарс жараёнида айнан Муҳаммадга кўпроқ эътибор қаратган ҳолда, унинг билимини баҳолаш ниятида икки марта доскага чиқардим. Ўша куни Муҳаммад геометрия фанидан «беш», алгебра фанидан эса хатоларга йўл қўйгани учун «тўрт» баҳо олди».
"Муҳаммаднинг онаси ҳар сафар 6- ва 7-соатларда ўғлига рухсат беришимизни сўраб, ўғлини репетиторга қўйса, балки ўзлаштириб кетар, деган фикрни айтарди, – дейди 7-«А» синф раҳбари Алишер Ёрбобоев. – Аммо мен ҳар сафар онасига мактабимизда ҳам етарли даражада дарс берилаётганини, агар ўқувчига ҳаддан ортиқ ўқиш вазифаси юклатилса, у фандан безор бўлиб қолиши мумкинлигини айтганман. Шу сабабли ўғлига кўпроқ ўзи эътибор бериши керак экани, ҳали ўзлаштириб кетишини таъкидлаганман".
«Муҳаммадни ҳам бошқа ўқувчилар қатори ўзлаштириши суст бўлган пайтлари баъзан койиб турардим, – дейди математика фани ўқитувчиси Бунёд Тошев. – Яхши ўқисин, деган мақсадда».
Алишер Ёрбобоевнинг маълум қилишича, Муҳаммаднинг отаси 24 ноябрь куни ўтиши лозим бўлган ота-оналар мажлисига иши борлиги сабаб, 2 соат олдин келиб, ўғли хусусида сўрайди. Синф раҳбари эса ўқувчисининг баъзи фанлардан ўзлаштириши паст эканлигини билдиради. Шундан сўнг 27 ноябрь куни онаси дарс таҳлилига келади.
«Муҳаммад кўпроқ расм чизишга, нималардир ясашга қизиқарди», – дейди Муҳаммаднинг синфдош дўсти Ўктам Эргашев. – У ҳамма фанлардан яхши ўқирди, фақат математикани ўзлаштиришдан қийналарди. Онаси мактабга келган куни ҳам ўғли математикадан яхши баҳо олмагани учун хафа бўлиб кетган экан».
«26 ноябрь куни айнан шу синф ўқувчилари билан машғулот олиб боргандим, – дейди мактаб психологи Нилуфар Ҳамидова. – Тест жараёнида ўқувчилар қатори Муҳаммаднинг ҳам санъатга, расм чизишга бўлган қизиқиши аниқланганди. Аммо Муҳаммадда тушкунлик кайфиятини сезмаган эканман. Агар унда руҳий тушкунлик ҳолати бўлганда, ўша куни албатта у билан алоҳида тартибда суҳбатлашган бўлардим. Чунки ҳар сафар тест олганимда, айнан тушкунлик ҳолати сезилган болалар билан алоҳида тартибда ишлайман. Иш услубим шунақа».
«Сешанба куни (27 ноябрь назарда тутилмоқда) Муҳаммаднинг оёқ кийими ҳам йиртилиб кетганди, – дейди Муҳаммаднинг синфдоши Элчинбек Ғайратжонов. – Кейин «суперклей» олиб келиб, ямашга ҳаракат қилдик. Нам бўлгани учун оёқ кийимини ямай олмадик. Шунда Муҳаммад Жавоҳир деган синфдошимизнинг оёқ кийимини олиб, дарс тугамаса ҳам уйига кетди».
«Муҳаммаджон онаси келган куни ҳақиқатдан ҳам тўрт соат дарсда ўтириб, кейин рухсат олиб уйига кетган", – дейди мактаб-интернат директорининг маънавий-маърифий ишлар бўйича ўринбосари Лобар Алимардонова.
Марҳумнинг бувиси невараси сешанба куни дарсдан қайтгач, уйга келганини тасдиқлади. Унинг сўзларига кўра, Муҳаммад овқатини еб бўлгач, молхона томонга ўтиб, молларига қараган.
«Ўша куни Муҳаммад дарсдан қайтган пайтда уйда онаси ва сингиллари бўлган, – дейди бувиси. – У икки маротаба уйга тез-тез кириб чиққан. Кейин орада бир соатлар ҳаяллаб қолгач, онаси излаб чиққан ва воқеанинг устига борган".
«Муҳаммаджон Муҳаммаджон эди-да, – дейди қўшниси Минглиш Гадоева. – Ҳаммамизни куйдириб кетди. У жуда ақлли бола эди. Мен ҳавас қилардим бу болага. Вос-вос деганлари шу бўлса керакдир-да. Йўқса, шундай намунали оиланинг ақлли фарзанди бундай иш қилмасди».
«27 ноябрь куни қишлоғимизга тез ёрдам машинаси келди, – дейди «Чуқун» маҳалласи раиси Жовли Ҳусанов. – Сал ўтмай, туман ички ишлар бўлимидан телефон қилишиб, воқеа хусусида билдиришди. Тезда ўша ерга етиб бордим. Борсам, Муҳаммаднинг отасини қўлида бир энлик хат бор экан. «Нима бўлди?» деб сўрасам, у ўғли хат ёзиб, унда ота-онасини, сингилларини яхши кўришини, синфдош дўстидан крассовка олганини, уни эгасига қайтариб беришлари кераклигини айтганини маълум қилди. Отасининг айтишича, Муҳаммад хатда магнитофон ва бошқа нарсалар ўзиники эканлигини, қолган гапларни эса телефон «флешка»сидан ўқиб олишларини ёзган ва кейин томнинг болорига ўзини осган".
«Ҳақиқатан ҳам, хат ёзиб кетган экан, – дейди исм-фамилиясини айтишни истамаган Чуқун маҳалла профилактика инспектори. – Аммо хатда нима ёзилганидан хабаримиз йўқ. Хатни прокуратура олган экан. Бизга маълум бўлишича, бола шаҳардаги мактабда ўқиган. Охирги пайтларда фанларни ўзлаштириши паст бўлгани учун ўқитувчилари ота-онасини чақириб, боланинг ўқишлари сустлашиб кетаётганини айтган».
Шаҳрисабз туман прокурори ўринбосари Бобур Баҳромовнинг маълум қилишича, воқеа туман прокуратураси томонидан ўрганилмоқда. Аммо ҳали ҳеч қандай жиноят иши қўзғатилмаган.
Маҳалла раиси Жовли Ҳусановни марҳумнинг бувиси Чинни Бобоқуловага асосланиб маълумот беришича, сешанба куни мактабдан қайтган Муҳаммаднинг кайфияти бўлмаган. «Каттасига (бувиси назарда тутилаяпти) тўйиб кетдим ҳаммасидан» деган гапни айтган.
«Уйдагилари ҳам хавфсираган боланинг ҳаракатидан, – дейди маҳалла раиси. – Шунинг учун ҳам ярим соатлар кўринмай қолгач, онаси ва каттаси излашга тушган».
«Мактабда ойнани синдирган, деган гап ҳам бор», – дейди маҳалла раиси Жовли Ҳусанов, посбон Муйсин Бердиев, котиб Баҳром Хуррамов. – Қолаверса, вос-вос ҳам бўлган бўлиши мумкин".
«Ўша куни мактабда ҳамшира хонасидаги деразалардан бирининг ойнаси сингани рост, – дейди мактаб интернати директорининг маънавий-маърифий ишлар бўйича ўринбосари Лобар Алимардонова. – Аммо ОАВда ёзилгани каби Муҳаммаджон ойнани синдирмаган. Ўша куни ойна синган пайт воқеа устига ўзим бордим. Ойнани 6-синф ўқувчилари Достон Усмонов ва Сардор Хушвақтовлар синдиргани аниқланди. Шунда 6-синф раҳбари Сарвиноз Насриддиновага айтиб, айбдорларнинг уйдагиларини чақириб, ўша куни ойнани тузатиб қўйдик".
Изоҳ (0)