Фарғонада автомобиль харид қилишда ёрдам беришни таклиф қилган фирибгар ўз қурбонлари ишончига кириб, уларнинг 9 миллиард 329 миллион сўмини ўзлаштирди. Ушбу жиноят иши бўйича суд ҳукми эълон қилинди, дея хабар берди «UzNews».
«Фарғона авто савдо» масъулияти чекланган жамиятининг омбор мудири вазифасида ишлаган I.Телябаев 73 нафар фуқарога автомобиль олиб беришга ваъда берган.Суд материалларида у асосан жабрланувчилар билан шахсий ёки қариндошлик муносабатларидан фойдаланиб, улардан нақд пул шаклида автомашиналар учун тўловларни қабул қилиб, айримларига автомашина сотиб олиб беришни ваъда қилган. Айбдор ўз ваколатидан четга чиққан ҳолда 2017- йилнинг июлидан 2018 йилнинг май ойига қадар 9 миллиард 329 миллион сўм пул маблағларини ўзлаштирган.
Жиноят ишлари бўйича Сўх тумани судининг 2018 йил 3 декабрдаги ҳукмига кўра, Илҳом Телябаев алдаш ва ишончни суиистеъмол қилиш йўли билан жуда кўп миқдордаги ўзганинг мулкини қўлга киритганликда, Ўзбекистон Республикаси Жиноят Кодекси 168-моддаси 4-қисмининг «а» банди билан айбдор деб топилиб, тўққиз йил муддатга озодликдан маҳрум этиш жазоси тайинланди.Иш бўйича 14 нафар жабрланувчилар томонидан уларга етказилган 1 миллиард 749 миллион сўм моддий зарардан ихтиёрий воз кечилган бўлиб, қолган жабрланувчиларга етказилган 7 миллиард 579 миллион сўм моддий зарарни судланувчидан ундириш белгиланди.Суд жиноятларни содир этилиши сабаблари ва шарт-шароитларини бартараф этиш юзасидан «Ўзавтосаноат» акциядорлик жамиятига хусусий ажрим билан муносабат билдирди.
Изоҳ (0)