Бугунги кунда халқаро ҳамкорликлар доирасида хорижий оммавий ахборот воситалари вакиллари Ўзбекистонда олиб борилаётган туб ислоҳотларга катта қизиқиш билан қарамоқда, деб хабар беради ИИВ Жамоатчилик ва оммавий ахборот воситалари билан алоқалар бошқармаси.
Шунингдек, Ўзбекистонда инсон ҳуқуқларини ҳимоя қилиш масаласи, шу жумладан, хавфсизликни таъминлаш, терроризм ва экстремизмга қарши курашиш борасида олиб борилаётган ишлар ҳам хорижликлар диққатидадир.
Шу кунларда Швециянинг «ТВ 4» телеканали мухбири Тереза Кристианссоннинг Ўзбекистонга ташрифидан ҳам кўзланган мақсад, айнан мамлакатда бу борада амалга оширилган ишларни ёритишдир.
Бугун Ички ишлар вазирлигида хорижий мухбир билан Вазирлик Жамоатчилик ва оммавий ахборот воситалари билан алоқалар бошқармаси бошлиғи Қутбиддин Бурхонов ҳамда Терроризм ва экстремизмга қарши курашиш бош бошқармаси масъул ходими Дилмурод Муҳитдиновлар иштирокида учрашув ўтказилди. Қутбиддин Бурхонов мамлакатда ички ишлар органлари томонидан олиб борилаётган ишлар, тизимда ўтказилган ислоҳотлар билан меҳмонларни таништирди.
Шунингдек, Дилмурод Муҳитдинов адашиб турли эктремистик оқимларга кириб қолган фуқароларимизни бир қанчаси афв этилгани ва улар махсус рўйхатдан чиқарилиб, соғлом турмуш кечиришлари учун муносиб шароитлар билан таъминланганини қайд қилди.
Учрашувдан сўнг Тереза Кристианссон илгари чет мамлакатлардаги ҳарбий тўқнашувларда қатнашиб, Ўзбекистонга қайтарилган фуқаролар билан суҳбатлашди.
Ташриф доирасида меҳмонлар Ўзбекистонда бошқа соҳа вакиллари билан учрашишлари режалаштирилган.
Изоҳ (0)