2019 йил 1 январдан бошлаб кўчмас мулкни ижарага бериш шартномаларини мажбурий нотариал тасдиқлаш бўйича талаб бекор қилинади ва давлат солиқ хизмати органларида мажбурий ҳисобга қўйиш тартиби ўрнатилади. Бу ҳақда қўмита матбуот хизмати хабар берди.
Кўчмас мулкни ижарага бермоқчи бўлган юридик ва жисмоний шахслар ўзларига мулк ҳуқуқи асосида тегишли бўлган турар ёки нотурар мулкларини ижарага беришда икки томонлама ижара шартномаси тузиши ва шартномани давлат солиқ хизмати органларида ҳисобга қўйиши шарт.
Ижара шартномасини солиқ органларида ҳисобга қўйиш иккита усулда:
Давлат солиқ қўмитаси сайтидаги «Ижара шартномаларини ҳисобга олиш» интерактив хизмати орқали;
Жисмоний шахснинг доимий яшаш, юридик шахснинг давлат рўйхатидан ўтган жойидаги давлат солиқ инспекцияларида белгиланган шаклдаги сўровномани тақдим этиш орқали амалга оширилади.
Ижара шартномасини солиқ органларида ҳисобга қўйиш учун сўровномага қуйидаги ҳужжатлар илова қилинади:
Ижара шартномаси;Жисмоний шахснинг ёки юридик шахс раҳбарининг шахсини тасдиқловчи ҳужжат.
Ижарага берувчи жисмоний шахс томонидан кўчмас мулкни ижрага беришдан олинган даромадлар бўйича дастлабки декларацияни тақдим этиш талаб этилмайди.
Шартномани ҳисобга қўйиш учун солиқ органлари томонидан ҳеч қандай ҳақ олинмайди.
Кўчмас мулк ижара шартномаларини давлат солиқ хизмати органларида мажбурий ҳисобга қўйиш тартибига риоя этмаслик Маъмурий жавобгарлик тўғрисидаги кодекснинг 159-1-моддасига асосан энг кам иш ҳақининг беш бараваридан ўн бараваригача миқдорда жарима солинишига сабаб бўлади.
Изоҳ (0)