Сурхондарё вилоятидаги тижорат банкларидан бирида кредит бўлими мутахассиси бўлиб ишлаётган Санжар Нуриев Музработ тумани Ат-Термизий маҳалласида яшовчи Ашур Чориевга ўзини банкнинг кредит бўлими бошлиғи сифатида таништириб, унга Nexia-3 автомашинасини сотиб олиши учун автокредит расмийлаштириб беришни ваъда қилади. Бу ҳақда ЎзА хабар бермоқда.
Шаҳардаги Боғзор маҳалласи ҳудудида унинг 21 миллион 80 минг сўм пулини олиб, ўзлаштириб кетади. Ҳужжатни кутавериб, тоқати-тоқ бўлган А. Чориев орадан қарийб бир ой ўтгач бу ҳақда ички ишлар бўлимига маълум қилади.
Мазкур ҳолат бўйича олиб борилган дастлабки суриштирув ишлари натижасида С. Нуриевнинг бошқа қилмишлари ҳам фош бўлиб қолди. Жумладан, Термиз шаҳридаги «Гулираъно» маҳалласида яшовчи Баҳром Намозовнинг 38 миллион сўм, Қумқўрғон тумани «Сурхон соҳили» маҳалласида яшовчи Собир Менгноровнинг 21 миллион 79 минг сўм пулларини автокредитнинг бошланғич омонатини расмийлаштириб бериш учун, дея олиб ўзлаштириб кетгани аниқланди.
Айни пайтда тижорат банкининг ходимига нисбатан Жиноят кодексининг 168-моддаси 3-қисми «б» банди билан жиноят иши қўзғатилди.
Изоҳ (0)