Шарқий Тиморда тимсоҳларнинг одамларга ҳамла қилиши 24 мартага ошди. Бунга Австралиядан судралиб юрувчиларнинг миграцияси сабаб бўлиши мумкин, деб ёзади ABC News.
Биологлар Себастьян Брекхейн ва Грем Уэббнинг аниқлашича, 1996-дан 2014 йилгача тимсоҳлар орол аҳолисига 130 марта ҳамла қилган, уларнинг аксарияти сўнгги етти йилда бўлган. Агар 2007 йилга қадар Шарқий Тиморда бир йилда бир марта ҳужум қайд этилган бўлса, эндиликда тимсоҳлар йилига 14 марта ҳамла қилмоқда.
52 фоиз ҳолатларда тимсоҳларнинг ҳамласи аянчли, инсон ўлими билан ниҳоя топган. Шунга қарамай мамлакат ҳукумати судралиб юрувчиларнинг тажовузига қарши чора кўрмаяпти. Гап шундаки, Шарқий Тимор аҳолиси учун тимсоҳлар муқаддас жонзот бўлиб, улар яхши инсонларга хавф туғдирмайди. Оролининг балиқ хўжалиги вазирига таяниб Брекхейн, тимсоҳларни табиатнинг судьялари деб саналишини айтади. Унинг сўзларига кўра, тимсоҳлар жуда адолатли ва одамлардан фарқли ўлароқ адашмайди.
Олимларнинг тахминларича тимсоҳлар ҳужумининг тез-тез такрорланиши Австралиядан уларнинг оқими ошиши билан боғлиқ. Брекхейннинг баҳолашича, бир тимсоҳнинг Австралиянинг Шимолий ҳудудидан 600 километр масофани ортда қолдириб оролга келишига 15 кунга яқин вақт керак. Шарқий Тимор йўналишида сузаётган тимсоҳларни Австралиянинг нефть платформаларидан бир неча бор кўришган.
Ушбу фараз юзасидан сўнгги қарорга келиш учун Тимор тимсоҳларининг ДНК таҳлилини ўтказиш лозим. Брекхейн ва Уэбб тез орада бу ишга киришади.
Шарқий Тимор Индонезия ва Австралия ўртасидаги Ҳинд океанида жойлашган. Оролнинг майдони 15 минг квадрат километрни, аҳолиси — 1,3 миллион кишини ташкил қилади.
Изоҳ (0)