Қишлоқ жойларда ва фуқароларнинг айрим тоифалари учун арзон уй-жойлар қуришни кенгайтиришга оид қўшимча чора-тадбирлар тўғрисидаги Президент қарори қабул қилинди. Бу ҳақда «Ҳуқуқий ахборот» канали маълум қилди.
Қарор билан қишлоқ жойларда уй-жой қурилишини янада ривожлантириш ва муҳтож оилаларни арзон уй-жой билан таъминлашнинг устувор йўналишлари белгиланди.
Ҳужжатга мувофиқ, 2019 йилдан бошлаб қуйидаги янги намунавий лойиҳалар бўйича арзон уй-жойлар қурилади:
«Обод қишлоқ» дастурига киритилган, шунингдек, муҳандислик-транспорт коммуникациялари билан таъминланмаган ҳудудларда 0,02 га ўлчамли ер участкаларида бир қаватли 3 хонали арзон уйлар;
«Обод қишлоқ» дастурига киритилган, шунингдек, муҳандислик-транспорт коммуникациялари билан таъминланган ҳудудларда тўрт қаватли (2 ва 3 хонали) арзон уйлар;
Шаҳарларда Мудофаа вазирлиги, Миллий гвардия ҳарбий хизматчилари ҳамда ички ишлар органлари ходимлари учун беш қаватли (2 ва 3 хонали) арзон уйлар.
Қарор билан 2019—2020 йилларда қишлоқ жойларда ва фуқароларнинг алоҳида тоифалари учун арзон уй-жойлар қурилиши бўйича, шунингдек, арзон уй-жой массивларида ташқи муҳандислик тармоқлари, иншоотлари ва транспорт коммуникациялари қурилиши бўйича йиғма кўрсаткичлар тасдиқланди.
Ушбу кўрсаткичларга кўра 2019 йилда жами 15 минг 10 та арзон уй-жой ва квартира қурилиши режалаштирилган. Уларнинг 11 минг 70 таси уй-жой шароитини яхшилашга муҳтож оилалар учун мўлжалланган. Шунингдек, 2019 йилда фуқароларнинг алоҳида тоифалари (Мудофаа вазирлиги, Миллий гвардия ҳарбий хизматчилари ва ички ишлар органлари ходимлари) учун жами 2 минг 10 та квартира қурилади.
2019 йил 1 июлгача арзон уй-жойлар қурилиши мониторинги бўйича ахборот тизими ишлаб чиқилади.
Эндиликда муҳандислик-транспорт коммуникацияларига уланмаган, узлуксиз электр ва сув таъминоти йўлга қўйилмаган арзон уй-жойлар фойдаланишга қабул қилинмайди.
Тижорат банклари уй-жой қурувчиларга 2 йиллик имтиёзли давр ҳамда 5 йил мобайнида йиллик 7 фоиз ставкаси билан ва кейинги даврда Марказий банкнинг қайта молиялаштириш ставкаси миқдорида;
Қишлоқ жойлардаги арзон уй-жойларни сотиб олиш учун — 20 йил муддатга ва бошланғич бадали 10 фоиз миқдорида;
Фуқароларнинг алоҳида тоифалари томонидан арзон кўп квартирали уйларни сотиб олиш учун — 15 йил муддатга ва бошланғич бадали 25 фоиз миқдорида ипотека кредитлари тақдим этади.
Бундан ташқари, қарорга мувофиқ Тошкент шаҳрида ҳар йили Фавқулодда вазиятлар вазирлиги ҳарбий хизматчилари, қутқарувчилари ва ходимлари учун 56 та, Миллий гвардия ҳарбий хизматчилари учун 300 та, ички ишлар органлари ходимлари учун 168 та, алоҳида намуна кўрсатаётган ёш оилалар учун 420 та, оғир ижтимоий вазиятга тушиб қолган хотин-қизлар учун 66 таквартира ажратилади.
Изоҳ (0)