Жаҳон Фанлар академияси (Триест, Италия) ва Хитой Фанлар академияси президенти Бай Чунли бошчилигидаги Хитой илмий-текшириш муассасалари раҳбарларидан иборат делегация Инновацион ривожланиш вазири Иброҳим Абдураҳмонов билан учрашди. Бу ҳақда «Дарё»га вазирлик матбуот хизмати маълум қилди.
Юздан ошиқ илмий-тадқиқот муассасаларини ўз ичига олган Хитой Фанлар академияси юқори технологиялар, инновацияларни иқтисодга жорий этиш бўйича етакчи ташкилот ҳисобланади. У нафақат илмий тадқиқотлар билан шуғулланади, балки унинг қошидаги учта йирик университет турли йўналишлар бўйича магистрантлар ва докторантларга таълим бериш билан ҳам шуғулланади.
Бугунги кунда бу университетларда хорижлик талабалар, ёш илмий ходимлар учун махсус стипендиялар жорий қилинган бўлиб, айни пайтда бу ўқув муассасаларида 20 нафардан ортиқ ўзбекистонлик таълим олиб келмоқда. Томонлар таълимнинг бу йўналишини ривожлантириш борасида ҳамкорликда ишлар амалга ошириш, биргаликда грантлар эълон қилиш, Хитой илмий-тадқиқот муассасаларининг филиалларини очиш мумкинлигини таъкидлади.
Хитойлик олимлар глобал иқлим исиши ва қурғоқчилик бўйича илмий изланишлар асосида қатор амалий ишларни амалга ошираётганларини инобатга олиб, Оролбўйи ҳудудида юзага келган жиддий муаммоларни бартараф этишга ҳиссасини қўша оладиган малакали илмий кадрлар тайёрлаш масалаларини кўриб чиқиш лозимлиги муҳокама қилинди. Жумладан, қурғоқчилик ва шўралаган тупроқ шароитида ўсиб унадиган, ҳосил берадиган ўсимликлар уруғларини етиштириш масаласи долзарблигига ҳам алоҳида эътибор қаратилди.
Профессор Бай Чунли ноябрь ойининг бошларида Илмий-техникавий ривожланишни қўллаб қувватловчи халқаро иттифоқ тузилгани ва унга 9 мамлакат Фанлар академиялари, жумладан, Ўзбекистон Фанлар академияси ҳам кирганини айтиб, мазкур платформада кўплаб сермаҳсул илмий изланишлар қилиш, ёш олимларни тайёрлаш мумкинлигини айтди.
«Бир макон – бир йўл» иқтисодий ривожланиш стратегияси ва Шанхай ҳамкорлик ташкилоти доирасида инновацион лойиҳаларни амалга ошириш имкониятлари кенглиги боис икки давлат илмий-тадқиқот муассасалари олдиларига аниқ мақсадларни қўйиб, ҳамкорликни янада кучайтириш лозимлиги қайд этилди.
Изоҳ (0)