Ўзбекистондаги тижорат банклари кредит бериш учун мижозлардан қўшимча тўловларни талаб қилиб келган. Марказий банкка келиб тушган шикоятларни ўрганиш натижаси шундан далолат бермоқда. Бу ҳақда МБ истеъмолчилар ҳуқуқларини ҳимоя қилиш департаменти директори Баҳодир Мирзаевга таяниб, «Turon 24» хабар берди.
«Банклар мижозлардан кредит бериш жараёнида аризани кўриб чиқиш ва кредит бериш учун комиссия тўлови каби қўшимча тўловларни талаб қилган. Қизиғи, ушбу тўловлар ҳақида олдиндан эмас, фуқаро кредит олаётганида маълум қилинган. Бир хизмат турини тақдим этиб туриб, унга бошқа хизмат турларини қўшиб юборишга одатланишган», — дейди Мирзаев.
Марказий банк маълумотларига кўра, ўтган йили тижорат банклари фаолияти бўйича шикоятлар сони 60 мингдан ошган. Шикоятларнинг асосий қисми айнан банкдан кредит олишдаги муаммолар ҳақидадир.
«Фуқаролар асосан кредит олиш жараёнида бюрократик тўсиқлар кўплигидан норози. Бу эса мижознинг кредит олиш имкониятини анча чеклайди. Шунингдек, валюта айирбошлаш, банкка омонат қўйиш, пул жўнатиш ва шунга ўхшаган чакана банк хизматлари даражасининг пастлиги ҳам шикоятлар кўплигига асос бўлмоқда», — дея таъкидлайди Баҳодир Мирзаев.
Хусусан, ҳозир мамлакатдаги тижорат банклари кўрсатаётган хизматлар сифати пастлигининг асосий сабаби улар ўртасида рақобатнинг жуда кучсизлигидир. Бунга сабаб эса, Марказий банкнинг фикрича, тижорат банкларининг устав капиталида давлат улуши жуда юқорилиги (80 фоиздан ошиқ) ҳисобланади. Шу сабабдан давлат банклари ўзларини бемалол ҳис этади ва хизмат сифатини яхшилашга унчалик қизиқмайди.
Изоҳ (0)