Бухоро давлат университетида Япония университети билан ҳамкорликда туризм таълими ва тадқиқотлари маркази очилди

Жорий йилнинг 21 ноябрь куни Бухоро давлат университетида Япониянинг Вакаяма университети, Ўзбекистон Вазирлар Маҳкамаси ҳузуридаги «Эл-юрт умиди» жамғармаси ҳамда Ўзбек-япон маркази ҳамкорлигида «БухДУ-Вакаяма туризм таълими ва тадқиқотлари маркази» очилиши маросими бўлиб ўтди. Бу ҳақда вилоят ҳокимлиги матбуот хизмати маълум қилди.

БухДУ ва Вакаяма университети ўртасидаги ҳамкорлик алоқалари жорий йилнинг 16 апрель куни имзоланган ўзаро шартнома доирасида олиб борилмоқда.

Вакаяма университети Туризм факультети ўз бакалавриат дастурлари учун Бутунжаҳон туризм ташкилоти UNWTO’нинг ТедҚуал сертификатини қўлга киритган бўлиб, туризм йўналишида бундай сертификатга эга бўлган биринчи ва ягона япон университетидир. Факультет ҳузурида «Туризм тадқиқотлари маркази» фаолият кўрсатади. Айни пайтгача мазкур университетдан БухДУга бир неча маротаба профессор-ўқитувчилар илмий маърузалар ўқиш учун ташриф буюрган.

«БухДУ-Вакаяма туризм таълими ва тадқиқотлари маркази»нинг асосий вазифалари ўзаро ҳамкорликда туризм соҳасида тадқиқотлар олиб бориш билан бир қаторда янги ўқув адабиётлари тайёрлаш, илмий-услубий йўналишларда қўшма лойиҳалар, бакалавриат ва магистратурада қўшма ўқув дастурларини амалга оширишдир.

Марказ фаолиятини қўллаб-қувватлашда Вазирлар Маҳкамаси ҳузуридаги «Эл-юрт умиди» жамғармаси ҳамда Ўзбек-япон марказининг Бухоро филиали яқиндан кўмак беради. «Эл-юрт умиди» жамғармаси Япониядан профессор-ўқитувчи ва тадқиқотчиларни таклиф қилиш, БухДУ вакилларини Вакаяма ва бошқа етакчи япон университетларига малака оширишга юбориш, замонавий ўқув адабиётлари билан таъминлашда ёрдам кўрсатади. Ўзбек-япон маркази Бухоро филиали туризм учун япон тили ва маданияти курсларини ташкил этади.

Марказ ихтиёрига ажратилган хоналар БухДУ иштирок этган Европа Комиссиясининг Tempus ва Erasmus+ дастурлари доирасида таълим сифатини ошириш мақсадида олиб келинган энг замонавий техник жиҳозлар билан таъминланган.

Марказда яқин ойлар ичида 10 дан ортиқ дарслик ва қўлланмалар ҳамкорликда тайёрланиши, БухДУ ва Вакаяма университети «Туризм» бакалавриат ва магистратура таълим йўналишлари ўқув дастурлари асосида ягона дастур ишлаб чиқилиши, 2019—2020 ўқув йилидан бошлаб, мазкур дастур асосида талабалар қабул қилиниши режалаштирилган. Мазкур масалалар 2019 йилнинг март ойида БухДУ делегациясининг Японияга ташрифи доирасида якунига етказилади.