Бугун, 8-ноярб куни Ўзбекистон мудофаа вазири генерал-майор Абдусалом Азизов АҚШ мудофаа вазирининг Жанубий ва Марказий Осиё ишлари бўйича ёрдамчисининг ўринбосари Колин Жексон бошчилигидаги ҳарбий делегацияни қабул қилди. Бу ҳақда вазирлик матбуот хизмати «Дарё»га маълум қилди.
АҚШ қуролли кучлари делегациясининг Ўзбекистонга ташрифидан мақсад — икки мамлакат мудофаа идоралари ўртасида халқаро ҳарбий ҳамкорликнинг ҳозирги аҳволи ва уни ривожлантириш истиқболларини муҳокама қилишдан иборат.
Ўзбекистон томони ҳарбий ва ҳарбий-техника соҳасида, шунингдек, минтақада хавфсизликни таъминлаш борасидаги долзарб масалалар борасида Ўзбекистон—Америка мудофаа идоралари ўртасидаги келишувларга алоҳида эътибор қаратмоқда.
Учрашув давомида Афғонистондаги вазиятни ўнглаш, халқаро терроризмга барҳам бериш ҳамда минтақада тинчликни барқарор ушлаб туриш бўйича фикрлар алмашилди.
«АҚШ — биз учун ишончли, узоқ йиллар давомида синалган ҳамкор бўлиб, ўртамиздаги дўстлик ва ўзаро муносабатлар доимий равишда олдинга қараб силжимоқда. Дунёдаги қудратли жанговар имкониятга эга мамлакат билан мустаҳкам алоқа ўрнатиш, шубҳасиз, бизнинг армиямиз жанговар шайлигини оширишга ҳам ижобий таъсир кўрсатади», — деди учрашув давомида Абдусалом Азизов.
Ўзбекистон мудофаа вазири билан учрашувдан сўнг АҚШ делегацияси Қуролли Кучлар академиясида бўлди.
Меҳмонлар академия биносида жойлашган АҚШ мудофаа соҳасига оид мавзувий машғулот хонаси билан ҳам танишиб, курсантлар учун яратилган шароитларни юқори баҳолади.
Изоҳ (0)