Сирдарё вилоятида жорий йилнинг 5 ноябрь куни «Вилоят аҳолиси томонидан куз-қиш мавсумида газ ва бошқа муқобил энергия манбаларидан фойдаланишда хавфсизлик талабларига риоя этилишини таъминлаш чора-тадбирлари« мавзусида семинар бўлиб ўтди. Бу ҳақда ЎзА хабар бермоқда.
Унда Сирдарё вилоят ҳокимлиги, вилоят Ёнғин хавфсизлиги бошқармаси, «Ўзбекэнерго« аксидорлик жамияти, Фавқулодда вазиятлар бошқармаси, вилоят газ таъминоти ҳамда унинг ҳудудий филиаллари иштирок этди.
Маълум бўлишича, сўнгги кунларда об-ҳаво ҳароратининг кескин пасайиб кетиши натижасида вилоят аҳолиси газ ва бошқа ёнилғи турларига мўлжалланган иситиш воситаларидан хавфсизлик талабларига риоя этмаган ҳолда фойдаланмоқда. Бу эса ўз навбатида уларнинг табиий ва ис газидан жабрланишларига сабаб бўлмоқда.
Бу бўйича келтириб ўтилган маълумотларга кўра, вилоят ҳудудида 2018 йилнинг 10 ойи давомида содир бўлган ёнғинлар сони 298 тани ташкил этиб, бу 2017 йилга нисбатан (315 та) 5,4 фоизга камайган. Ёнғин оқибатида инсонларнинг ҳалок бўлиш ҳолати эса 4 тани ташкил этиб, 2017 йилга (14 та) нисбатан 7,1 фоизга (1 тага) кўпайган. Октябрь ойида 38 та ёнғин ҳолати қайд этилган.
2018 йилнинг 2 ноябрь куни Гулистон шаҳар ҳамда Боёвут туманида яшовчи фуқаролар хонадонларидаги газ печидан сизиб чиққан ис газидан заҳарланиб, вилоят шошилинч тез тиббий ёрдам филиалининг токсикология бўлимига ётқизилган.
4 ноябрь куни Янгиер шаҳар, Т.Малик маҳалласида яшовчи фуқаро уйидаги газга мослаштирилган иситиш печининг носозлиги сабаб сизиб чиққан газдан заҳарланиб, шаҳар Тиббиёт бирлашмасининг жонлантириш бўлимига ётқизилган.
Жумладан, 1 ноябрнинг 5-санасига қадар 4 та ҳолатда 8 нафар инсонлар табиий ва ис газидан заҳарланиб, 1 нафари тан жароҳати олган.
Ноябрь ойининг яна шу санасида вилоятнинг Бахт шаҳрида яшовчи фуқаро ўз уйи ҳаммомига кириб, электр чироғини ёққан. Бу вақтда эса хавфсизлик талабларига зид равишда ўрнатилган газ баллон шлангидан сизиб чиққан газ ва ҳаво аралашмасидан ўт чақнаган. Натижада уй эгаси 80 % даражада куйиш тан жароҳати олиб, туман Тиббиёт бирлашмасига ётқизилган.
Юқоридаги ҳолатларнинг келиб чиқиш сабаблари тўлиқ ўрганилганда, аксарият газ ва ҳаво аралашмасининг чақнаши, инсонлар томонидан газдан чала ёниқ турган ҳолатда фойдаланишлари ва хавфсизлик қоидаларига амал қилмасликлари натижасида келиб чиққанлиги маълум бўлган.
Улар орасида табиий газ ва муқобил ёқилғи турларидан фойдаланишда техник ёки ёнғин хавфсизлиги қоидаларига риоя этилмаётганлиги, табиий газ тармоғига нотўғри уланиш, уйдаги газ плиталари орқали исиниш, хонадон ичида очиқ оловдан фойдаланиш, дудбуронларнинг носозлиги ёки умуман йўқлиги ҳолатлари ҳам асосий ўринни эгалламоқда.
Ушбу тафсилотлар баён этилгач, вилоят ҳокими ўринбосари Ж.Иброҳимов «Ўтказилиб келинаётган тарғибот ва ташвиқот ишларига қарамай, ёнғин ва ис газидан инсонларнинг зарар кўраётганлиги ҳолатлари тез-тез содир бўлаётганлиги, бу эса вилоят ва туманларда мавзу доирасида ҳали ҳеч қандай иш қилинмаётганлигини билдиришини«ни айтиб, йиғилиш қатнашчиларини танқид қилди.
Шу билан бир қаторда вилоят газ таъминоти ҳамда унинг ҳудудий филиаллари ходимларига ёнғинни олдини олиш ва газдан фойдаланишда хавфсизлик қоидаларига тўғри амал қилиш бўйича тарғибот ишларини янада кучайтириш, уйма-уй ҳар бир хонадонга ташриф буюриб, аҳолининг газ ва иситиш печларидан фойдаланиш ҳолатлари билан танишиш, уларнинг хавфсизлиги бўйича керакли чораларни тезкор равишда қўллаш вазифалари юкланди.
Изоҳ (0)