Шанхайда очилган China International Import Expo импорт товарлари ва хизматлари биринчи халқаро кўргазмаси ўз ишини давом эттирмоқда. Бу ҳақда «Дарё»га журналист Муҳаммаджон Обидов хабар берди.
Дунёнинг 130 дан ортиқ мамлакати ишлаб чиқарувчилари ўз маҳсулотларини Хитой бозорига олиб келди. Аслида уни жаҳон бозори дейилса тўғрироқ бўлади. Чунки расталарга қўйиб, харидорга таклиф этилаётган маҳсулотларга аввало хитойлик мижозлар, қолаверса, кўргазма иштирокчиси бўлган давлатлар бизнес вакиллари қизиқиш билдиряпти.
Expo залларидан бирида, энг нуфузли жойда Ўзбекистон ишлаб чиқарувчилари кўргазмаси очилган. Унинг пештахталари мамлакат тарихий обидалари тимсолига уйғунлашиб кетган. Бу ерда қуритилган мевадан вино маҳсулотларигача, кимёвий ўғитдан ширинлик ва қоракўлгача, ҳатто гранит безак тошларигача бор. Харидор ҳам бисёр. Бири пахта терадиган машина ҳақидаги маълумот билан қизиқади, бошқаси пахта ипи толасининг қуввати билан.
Музокаралар учун икки жой тайёрланган. Бири бўм-бўш, иккинчисида уч харидор маҳсулот эгаларини кутиб ўтирибди.
Бутун бошли Ўзбекистон кўргазмасида иштирокчилардан атиги бир киши — «N’MEDOV» бренди корхона менежери Наримон Баязитовни учратдик, холос. У Ўзбекистон махсулотларига қизиқаётган турли давлатлардан келган харидорларга «Мен ўзимиз олиб келган ширинликлар ҳақида айтишим мумкин, холос. Қолганларини билмайман», дейишдан чарчаган.
— Аслида 89 иштирокчимиз. Аммо улар форумга кириб кетган. Ўзим нима қилишни, нима дейишни билмаяпман. Биров қоракўл оламан, деб келади, бошқаси бўлак нарса, — дейди у.
Бу гап эрталаб соат 9:00 атрофида бўлганди. 10:30 ларда «Ўзбекнефтегаз»АЖ бош мутахассиси Нарбек Юлдашев етиб келди.
—Бу ердаги йўлни биласизку, — деди у транспортдаги тирбандликни баҳона қилиб. Аммо нега эртароқ йўлга чиқмаганини айтмади.
Шундай ҳолатлар бўлса ҳам, Ўзбекистон кўргазмасига келиб-кетувчилар тобора кўпайиб бормоқда. Кўргазма эса давом этмоқда.
Изоҳ (0)