Индонезиянинг Lion Air авиакомпаниясига тегишли, 29 октябрь куни ҳалокатга учраган самолётнинг тезлик кўрсаткичи сўнгги тўртта парвоз давомида носоз бўлган, деб ёзади Meduza. Бундай ахборот параметрик ўзиёзар (қора қути)ни расшифровка қилиш натижасида олинди.
Датчикнинг носозлиги ҳақидаги баёнот ҳалокат қурбонларининг қариндошлари иштирокида ўтказилган матбуот анжуманида ўқиб эшиттирилди. Улар нима учун носозлик ўз вақтида бартараф этилмаганига изоҳ талаб қилди.
Улар бу саволга жавоб ололмади. Lion Air асосчиси Рушди Кирана жимгина ўрнидан туриб, бошини эгди ва қўлларини қовуштирди, холос.
Датчикнинг носозлиги самолёт ҳалокатига сабабчи бўлган-бўлмаганлигига аниқлик киритилмаяпти.
Аввалроқ Индонезиянинг Lion Air авиакомпанияси самолёти катта тезликка сувга урилиши оқибатида бўлакларга ажралиб кетганлиги маълум қилинган эди.
Индонезиянинг Lion Air авиакомпаниясига тегишли «Боинг» самолёти 29 октябрь куни, Жакарта аэропортидан ҳаво кўтарилганидан 13 дақиқа ўтиб Ява денгизига қулаган эди. Самолёт бортида 189 киши бўлган. Уларнинг бари ҳалок бўлган.
Изоҳ (0)