31 октябрь куни Ўзбекистон бош вазири Абдулла Арипов раислигида ўтказилган йиғилишда Ўзбекистон бош прокурори Отабек Муродов бош прокурор бўлиш билан бирга, Ўзбекистон бош вазирининг ўринбосари — Қишлоқ ва сув хўжалиги, қишлоқ хўжалиги ва озиқ-овқат маҳсулотларини қайта ишлаш масалалари комплексининг раҳбари вазифасини бажарувчи этиб тайинлангани хабар берилган эди. Ҳуқуқшунос ва блогер Хушнудбек Худайбердиев ушбу хабарни мутахассис сифатида изоҳлади.
«ОАВларда Бош прокурор Отабек Муродов Қишлоқ хўжалиги масалалари бўйича Бош вазир ўринбосари вазифасини бажарувчи этиб тайинланганлиги ҳақида ёзишмоқда.
Айрим нашрлар ўз хабарида ‘Бош прокурорга янги лавозим берилди’, ‘Зойир Мирзаев ўрнига вақтинча раҳбар тайинланди’ мазмунида ёзишмоқда.
Бу мутлақо нотўғри талқин.
Қонунчиликка биноан, Бош прокурор бир пайтнинг ўзида Бош вазир ўринбосари этиб тайинланиши мумкин эмас. Прокуратура органларининг мустақиллик принципларига зид бу.
Аслида нима бўлган эди?
Аслида давлатимиз раҳбари томонидан Бош прокуратурага (яъни тизимга, шахсга эмас) Қишлоқ ва сув хўжалиги, қишлоқ хўжалиги ва озиқ-овқат маҳсулотларини қайта ишлаш масалалари комплексининг самарали фаолият олиб боришида кўмаклашиш ва бу соҳада қонунларнинг қатъий ижросини таъминлаш вазифаси юклатилди.
Лекин бу Сиз ўйлаганчалик, Бош прокурор бир пайтнинг ўзида Бош вазир ўринбосари бўлди дегани эмас», — дейилади ҳуқуқшуноснинг Telegram-каналига жойланган хабарда.
Изоҳ (0)