Тошкентда туризм, ОАВ ва тадбиркорлик доирасида ўзаро ҳамкорликни йўлга қўйиш, дўстлик алоқаларини ривожлантириш мақсадида ташкил этилган Ўзбекистон—Россия бизнес форуми бўлиб ўтди. Бу ҳақда «Дарё»га Ёшлар медиа маркази маълум қилди.
Икки томонлама муносабатлар тарихида илк бора ташкил этилган бизнес форумда Россия ёшлар иттифоқи, етакчи компания ва корхоналар раҳбарлари иштирок этди. Унда икки томон тадбиркорлари ўртасида 3 та келишув ва 57 дан ортиқ шартнома имзоланди, ёшлар туризми бўйича ҳамкорлик қилиш мақсадида 45 та келишув ҳамда20 та шартнома тузилди.
Шунингдек, «Ёшлар—келажагимиз» жамғармаси билан «Сколково ҳамжамияти» ўртасида «Таълим — икки мамлакат ўртасида тадбиркорлик ва лойиҳаларни ривожлантиришга элтувчи йўл» дастури ҳамда жамғарма ва «Инвест Консалтинг Реалити» МЧЖ ўртасида «Россия ва Ўзбекистонда кичик ва ўрта бизнес» дастури доирасида меморандумлар имзоланди.
Форум доирасида Ёшлар туризми агентлиги директори Камола Исмоилова ва «Конгрессорг» компанияси гуруҳлари раҳбари Олег Алмендеев ўзаро ҳамкорлик қилишга келишиб, шартнома имзолади.
Бундан ташқари таълим ва фармацевтика саноати соҳаларида ўзаро ҳамкорлик бўйича келишувлар ҳам имзоланди.
Самарқанднинг Registon мажмуасида бўлиб ўтган «Россия Федерацияси ва Ўзбекистон Республикаси ўртасидаги туристик оқимни кенгайтиришда ёшларнинг аҳамияти» мавзусидаги амалий конференциясидан сўнг туризм соҳасида яна бир қатор икки томонла келишувлар имзоланиши кутилмоқда.
Изоҳ (0)