Тошкент шаҳар ИИББ: Facebook фойдаланувчисининг шикояти ўз тасдиғини топмади

Facebook ижтимоий тармоғининг фойдаланувчиларидан бири – «Светлана Чумак» ўз саҳифасида танишининг кекса ёшдаги қариндошларига нисбатан босқинчилик ҳаракати юз бергани ҳақида хабар бериб ички ишлар ходимларининг хизматларидан норозилик билдирди, деб хабар беради Тошкент шаҳар ИИББ матбуот хизмати.

Хусусан, саҳифадаги пост муаллифининг таъкидлашича, воқеа жойига етиб келган ходимлар «7 соат ўтириб», ҳеч қандай чора кўрмасдан «раҳбариятга мурожаат қилишни» тавсия қилиб кетган.

Ушбу маълумот ҳақиқатга мос келмади. 82 ёшли Андрей П. ва 80 ёшли Людмила П.га нотаниш кимса томонидан тан жароҳатлари етказилганлиги тўғрисидаги хабар Чилонзор тумани ИИО ФМБга 28 октябрь куни тахминан соат 15:00 да жабрланувчилар мурожаат қилган шифохонадан келиб тушди.

Бошланғич сўровдан маълум бўлишича, тан жароҳатлари қарияларга уларнинг уйларига эшик очиқлигидан фойдаланиб кириб олган нотаниш кимса томонидан етказилган. I-24 кварталида жойлашган хонадонга терговчи, жиноят қидирув ходимлари, эксперт-криминалист, инспектор-кинолог ва хизмат ити, ҳудудий профилактика инспектори ҳамда 3-сон ички ишлар бўлими раҳбари ва Чилонзор тумани ИИО ФМБ жиноят қидирув бошлиғидан ташкил топган тезкор-тергов гуруҳи етиб келди.

Хонадон кўрикдан ўтказилиб, бармоқ излари олинди ва яқин жойлашган дорихона ва дўконларнинг камералари ёзиб олган тасвирлари кўздан кечирилиб, қўшнилар билан суҳбат ўтказилди.

«Бу ишларнинг ҳаммаси ҳақиқатдан ҳам кўп вақт талаб қилди, шундай экан, Facebook’даги ички ишлар ходимларининг ҳаракатсизлиги ҳақидаги хабарни асоссиз деб ҳисоблаймиз. Шунингдек, 3-сон ички ишлар бўлими ва Чилонзор тумани ИИО ФМБ раҳбарияти воқеа жойида бўлганлари сабаб, раҳбариятга мурожаат қилиш ҳақидаги тавсиянинг ҳам асоси йўқ», — дейилади хабарда.

Вазиятга ойдинлик киритиш мақсадида ИИББ ходимлари жабрланувчиларнинг невараси бўлган 23 ёшли Валерия М. билан боғланмоқда.

Ҳодисани ўзига тўхталадиган бўлсак, пенсионерларга тан жароҳатлари етказилгани факти асосида Ўзбекистон Республикаси Жиноят кодексининг 109-моддаси 2-қисми («Қасддан баданга енгил шикаст етказиш») бўйича жиноий иш қўзғатилди.

Жабрланувчиларга етказилган тан жароҳатларининг оғирлик даражасини аниқлаш мақсадида суд-тиббий экспертиза тайинланди. Экспертиза натижасидан келиб чиқиб ҳуқуқбузар ҳаракатларига қўшимча ҳуқуқий баҳо берилади. Гумонланувчининг шахсини аниқлаш бўйича чоралар кўрилмоқда.