Ўзбекистон Республикаси Бош вазир ўринбосари Зойир Мирзаев 29 октябрь куни ўз лавозимидан озод этилиши кутилмоқда. Бу ҳақда ҳукумат манбасига таяниб «Дарё» мухбири Севара Нишонова хабар берди.
27 октябрь куни ижтимоий тармоқларда Тошкент вилояти Оққўрғон тумани, «Абдуносир Ғулом» фермер хўжалиги майдонида юз берган ҳолат сурати тарқалди. Ушбу суратда Бош вазир ўринбосари Зоир Мирзаев ғаллага ўз вақтида сув қуймаган масъул ва фермерларни ариқ сувига тушириб қўйган ҳолда жазолагани акс этган эди.
«Дарё»нинг ҳукуматдаги манбаси хабар беришича, бугун, 29 октябрь куни селектор йиғилиши бўлиб ўтиши режалаштирилмоқда. Ушбу йиғилишда Бош вазир ўринбосари Зойир Мирзаевнинг ўз лавозимидан озод этилиши кутилмоқда.
Қайд этилишича, ушбу ҳолатга Зойир Мирзаевнинг ишдан бўшатилиши билан нуқта қўйилмайди. Ўзбекистон Республикаси Бош прокуратураси масаланинг ҳуқуқий жиҳатларини ўрганиб, текширув ишларини олиб боради ва айбдорлар қаттиқ жазоланади.
Ўзбекистон Президенти Шавкат Мирзиёев раҳбарлик лавозимида фаолият юритаётган шахслар барчага намуна бўлиши лозимлиги ҳақида кўп бора таъкидлаган:
«Қўл остидаги ходимлар сизга фақат иш юзасидан бўйсуниши, қолган масалаларда сиз билан теппа-тенг ҳуқуқ эгаси эканини асло эсингиздан чиқарманг! Мана шу гапларни жамоатчиликка, ҳаммага етказишингизни илтимос қиламан. Қонунларимизда бундай хатти-ҳаракатлар учун жавобгарлик белгилангани, жазо муқаррар эканини унутишга ҳеч кимнинг ҳаққи йўқ.
Барчангиз яхши биласиз, халқимиз ориятли, номусли халқ. Халқ барча нарсага чидаши мумкин, лекин, такрор ва такрор айтаман, адолатсизлик ва ноҳақликка асло чидай олмайди. Ҳақиқий раҳбар, ҳақиқий етакчи одамларнинг бардошини синаш учун эмас, балки уларга муносиб шарт-шароит яратиб бериш, оғирини енгил қилиш учун раҳбар этиб тайинланади».
Мавзуга доир: Ўзбекистон Меҳнат вазирлиги пахта даласи бўйидаги ариқ ичида турган олти эркакнинг сурати юзасидан илтимос билан чиқди
Мавзуга доир: Бош прокуратура «ариқдаги олтовлон» бўйича баёнот берди
Изоҳ (0)