Жорий йилнинг 10 ноябрь куни Ўзбекистон Ёшлар иттифоқи қошидаги Ўзбекистон ёшлари умумжаҳон ассоциацияси, Ўзбекистон Республикасининг Германия Федератив Республикасидаги элчихонаси ва Германиядаги «Ниҳол» ўзбек-олмон илмий-маданий жамияти ташаббуси билан Берлин шаҳрида «Хорижий инновацион ғоялар ва технологиялар ҳамда уларни Ўзбекистонда тадбиқ қилиш истиқболлари» мавзусидаги халқаро илмий-амалий анжуман бўлиб ўтиши режалаштирилган. Бу ҳақда Ўзбекистон Ёшлар иттифоқи матбуот хизмати хабар берди.
Мазкур илмий-амалий анжумандан мақсад, иқтисодий ва ижтимоий соҳаларда инновацион фаолиятни кенг жорий этиш бўйича Германиянинг илғор тажрибасини ўрганиш ва Ўзбекистонда амалга ошириш истиқболларини муҳокама қилиш, Германия ҳамда қўшни Европа давлатларидаги ўзбек ватандошлар томонидан турли хил йўналишларда ишлаб чиқилган инновацион ғоялар, ишланмалар, янги технологик лойиҳалар билан яқиндан танишиш ва ушбу лойиҳаларни Ўзбекистонда молиялаштириш масалалари юзасидан фикр алмашиш.
Бундан ташқари анжуманда тақдим этилган барча инновацион лойиҳа, маърузаларни мақолалар тўплами сифатида чоп этиб, тегишли вазирликлар ва ташкилотлар эътиборига ҳавола этилади.
Мазкур илмий-амалий анжуманда ўзбекистонлик ва хорижлик мутахассисларнинг Ўзбекистон Республикасида қишлоқ хўжалиги, соғлиқни сақлаш, инновацион технологияларни жорий қилиш, энергетика, молия ва суғурта, шаҳарсозлик, туризм ҳамда тадбиркорликни ривожлантиришга қаратилган тақдимотлари саралаб олинган.
Шунингдек, анжуманда Инновацион ривожланиш вазирлиги, Халқ таълими вазирлиги, Ўзбекистон ёшлар иттифоқи, Ўзбекистон Республикаси фанлар академияси, Туризмни ривожлантириш давлат қўмитаси, Савдо-саноат палатаси, Ўзбекистон ёшлари умумжаҳон ассоциацияси ҳамда «Эл-юрт умиди фонди» каби ташкилотлар масъул ходимларининг иштирок этиши кутилмоқда.
Изоҳ (0)