25 октябрь куни жиноят ишлари бўйича Хоразм вилоят суди томонидан Ўзбекистон Республикаси ЖК 168-моддаси (фирибгарлик) 4-қисмининг «а» банди билан О.Отамуратовга оид жиноят иши кўриб чиқилди. Бу ҳақда Жиноят ишлари бўйича Хоразм вилоят суди хабар берди.
О.Отамуротов таниши К.Ибрагимов билан учрашиб, унга «Cоcа-cола» яхна ичимлигини сотиб олиб, улгуржи нархда сотиб, фойдадан тушган маблағни тенг бўлиб, у билан шерикликда ишлашини айтиб, 140 000 000 сўм пулларини алдаб олиб, ишончига кириб, ишончини суиистеъмол килгани ҳолда пулларни фирибгарлик йўли билан қўлга киритган.
Бундан ташқари, О.Отамуротов такроран таниши Р.Матчанов билан учрашиб, унга тадбиркорлик фаолиятини кенгайтириш учун қисқа муддатга пул бериб турса, тез кунда фойда пуллари билан бирга кўпайтириб қайтариб беришини айтиб, уни алдаб, ишончига кириб, 94 000 000 сўм пулларини олиб, белгиланган муддатда қайтармасдан, пулларни ўз эҳтиёжларига ишлатиб юборган.
Суд томонидан О.Отамуротов жиноят натижасида етказилган зарарни тўлиқ қоплаганлигини, жабрланувчиларнинг унга нисбатан даъвоси йўқлиги инобатга олиниб, унга нисбатан озодликдан маҳрум қилиш билан боғлиқ бўлмаган жазо тури тайинланиб, суд залида камоқдан озод этилди.
Маълумот учун, шуни айтиб ўтиш лозимки 2018 йилнинг 9 ойи давомида жиноят ишлари бўйича Хоразм вилоят судлари томонидан 53 нафар шахс суд залида қамоқдан озод этилган.
Изоҳ (0)