Бугун, 26 октябрь куни Президент Шавкат Мирзиёев Юнусобод туманига ташрифи чоғида «Амилов» қандолат маҳсулотлари ишлаб чиқариш фабрикасини бориб кўрди. Бу ҳақда Президент матбуот хизмати маълум қилди.
Умумий қиймати 62 миллион доллар бўлган ушбу корхона Тошкентдаги собиқ «Лак-бўёқ» заводи ўрнида ташкил қилинган. Завод биноси реконструкция қилиниб, жорий йил 5 октябрда ишга туширилган. Германия, Швейцария, Италия, Австрия, Нидерландия каби давлатлардан замонавий технологиялар келтириб ўрнатилган. Қарийб 830 киши доимий иш билан таъминланган.
Корхона йилига 50 минг тоннага яқин қандолат маҳсулотлари ишлаб чиқариш қувватига эга. Бугунги кунда бу ерда шоколад, конфет, печенье, вафли каби 60 турдаги маҳсулот ишлаб чиқарилмоқда.
Бундай ширинликлар шу пайтгача Ўзбекистонга асосан импорт қилинарди. «Амилов» фабрикасида тайёрланаётган қандолат маҳсулотлари чет элникига нисбатан арзон ва сифатли бўлгани боис ички бозорни тез эгаллади. Натижада бундай маҳсулотлар импортини қирқ фоиз қисқартиришга эришилди. Қолаверса, корхона йилига 10 миллион долларлик экспорт қилишни режалаштирган.
Шавкат Мирзиёев фабриканинг ишлаб чиқариш қувватини кенгайтириш, бундай корхоналарни кўпайтириб, рақобатни ривожлантириш, импорт бўлаётган бошқа маҳсулотларни ҳам маҳаллийлаштириш бўйича топшириқлар берди.
Аввалроқ Президентнинг Юнусобод туманига ташрифи чоғида ҳудуддаги замонавий ишбилармонлик маркази лойиҳаси билан танишгани ҳақида хабар берилганди.
Изоҳ (0)