Жиноят ишлари бўйича Арнасой туман судининг очиқ суд мажлисида 1969 йил 19 мартда Жиззах вилояти Фориш туманида туғилган Раъно Мухторованинг (исм ва фамилия ўзгартирилган) жиноят иши кўриб чиқилди. Бу ҳақда суд матбуот хизмати хабар бермоқда.
«4 нафар фарзанднинг онаси Раъно болаларига ҳаром луқма едиришни афзал билиб, 2017 йил сентябрь ойининг ўрталарида Пахтакор деҳқон бозорига боради. Шу ердаги одамлардан суриштириб, бозорда савдо қиладиган форишлик аёлларни излайди.
У ерда Хусния Абдурахимова билан танишиб, кун кеч бўлиб қолганлиги сабаб қишлоққа қайтолмаслигини айтади. Шу билан Раъно Пахтакор туманида яшовчи таниши Хусния Абдурахимованинг хонадонига боради.
Ҳаммаси ўша кундан бошланади. Хусния Абдурахимовага тегишли 3 миллион 100 минг сўмлик турли кийим-кечакларни алдаб олишни режалаштиради. Ниҳоят бир ҳафта муддат ичида товарларни сотиб бериш шарти билан олади.
Орадан бир неча ҳафта ўтса-да, ‘Пулларни қайтараман’, деб муддатни ортга сураверади.
Шунингдек, ўша йили 6 декабрь куни Фориш тумани Қорабдол ҚФЙда яшовчи Гулнора Бўриеванинг ҳам ишончига киради. Гулнорага олдиндан 105 минг сўм бериб, унга тегишли бўлган 2 миллион 400 минг сўмлик кийимларни қўлга киритади.
Орадан бир кун ўтгач, Гулноранинг уйига яна бориб, ишонтириш мақсадида ‘Олдинги олиб кетган товарларнинг пули’, деб унга 300 минг сўм беради. Яна 4 миллион 420 минг сўмлик товарни олиб, унинг пулини ўзининг эҳтиёжи учун ишлатиб юборади. Шу орада олдинги олиб кетган товарларнинг 300 минг сўмини бериб, унга тегишли бўлган 1 миллион 861 минг сўмлик, кейинчалик, 4 миллион 322 минг сўмлик товарни ўзлаштириб юборади.
Нафсига қул, дарди пул бўлган бу кимса жорий йилнинг 13 февралида жамоат транспортида Зулфия Шокирова билан танишиб қолади. Суҳбат савдо масаласига бориб тақалади. Раъно айни кийим-кечак савдоси билан шуғулланишини айтади. Орадан 6 кун ўтиб Раъно З.Шокированинг хонадонига боради. 3 миллион 972 минг сўм бўлган товарни ўтказиб беришни ўз зиммасига олади. Шу тариқа Зулфия Шокирова бир неча бор Раънонинг алдовлари қурбонига айланади», — дейилади хабарда.
Раъно Мухторова ўзгаларнинг мулкини фирибгарлик йўли билан қўлга киритганликда айбланиб, унга нисбатан Ўзбекистон Республикаси жиноят кодексининг тегишли моддалари асосида узил-кесил 3 йил 6 ой муддатга озодликдан маҳрум қилиш жазоси тайинланди.
Изоҳ (0)