Америкалик полициячи аёл YouTube’даги мушук ҳақидаги ролик учун 8 ёшли қизини дўппослади

АҚШда полициячи аёл Жейми Макдональд YouTube’да видео эълон қилган саккиз ёшли қизчасини дўппослаганлик айби билан ҳибсга олинган. Бу ҳақда Daily Mail хабар берди.

Тергов маълумотларига кўра, офицер қизчаси уларнинг мушугини видеога олаётганини кўргач, қизчани урган ва ерга ағанатиб юборган. Видеода қизча онасининг мушукчадан халос бўлишга қарор қилгани учун қандай йиғлаётгани акс этган.

Қизчанинг полициячиларга маълум қилишича, Макдональд дастлаб уни YouTube’даги видеони ўчириб ташлашга мажбур қилган, кейин эса уни ерга йиқитиб, қорнига ўтириб олган ҳамда қўли ва юзига тинимсиз уришни бошлаган. Аёлни унинг 12 ёшли ўғли отасига қўнғироқ қилиш таҳдиди билан тўхтатиб қолган. У қизни калтаклашдан тўхтаган, бироқ болалардан мобил телефонларни олиб қўйган.

Макдоналднинг собиқ эри Дэвид Грентем болаларни мактабдан олганда, қизчанинг юзидаги кўкарган жойларни кўрган ва дарҳол полицияга мурожаат қилган. Полициячилар ҳам қизнинг бўйни ва қўлидаги лат еган жойларни пайқаган.

Болаларнинг кўрсатмаларидан кейин Макдональд ҳибсга олинган, бироқ тезда 25 минг доллар гаров эвазига озодликка чиққан. Аёл полицияда 2002 йилдан буён ишлаган, ҳодисадан кейин унга маъмурий таътил берилган.