Жисмоний тарбия ва спорт вазири Дилмурод Набиев Хоразм, Қашқадарё, Самарқанд вилоятлари ҳамда Қорақалпоғистон Республикаси спорт муассасалари фаолияти, куз-қиш мавсумига тайёргарлиги, 2018 йилда қурилиб фойдаланишга топшириладиган спорт объектларида олиб борилаётган ишлар, шунингдек, аҳолини жисмоний тарбия ва оммавий спортга қамраб олиш, улар ўртасида олиб борилаётган тарғибот ишлари билан танишди, деб хабар беради вазирлик матбуот хизмати.
Вазир ташрифи давомида Ўзбекистоннинг барча ҳудудларида ўтказилган ўрганиш жараёнида спорт таълим муассасаларида мавжуд 1089 та иситиш қозонидан 57 тасининг яроқсизлиги ва 116 та иситиш қозонига эҳтиёж мавжудлиги аниқланди. Йўл қўйилган камчиликларнинг келиб чиқиш сабаблари муҳокама қилиниб, хато ва камчиликларга йўл қўйган масъул ходимларга интизомий жазо чоралари қўлланилди.
Вазирлик тизимидаги спорт таълим муассасаларида иссиқлик меъёрида бўлишини таъминлаш мақсадида Ўзбекистоннинг барча ҳудудларида 807,5 метр квадрат яроқсиз ҳолга келиб қолган дераза ойналари алмаштирилди, электр тизими билан боғлиқ камчиликлар аниқланиб, бартараф этилди, 258 метр узунликдаги иссиқлик тармоғи изоляцияланди, 1941 тонна кўмир, 700,7 тонна брикет ёқилғиси билан таъминланди.
Спорт таълими муассасаларини 2018—2019 йиллар куз-қиш даврида барқарор ишлашга тайёрлаш бўйича барча ҳудудий ҳокимликлар томонидан 4,1 миллиард сўм ажратилиши режалаштирилган бўлиб, бугунги кунга қадар 3,2 миллиард сўм молиялаштирилган.
Изоҳ (0)