ЕТТБ Ўзбекистонга инфраструктура лойиҳалари учун 333 млн евролик узоқ муддатли кредитлар ажратади

Европа тикланиш ва тараққиёт банки Ўзбекистонга 6 та инфраструктура лойиҳасини амалга ошириш учун умумий қиймати 333 миллион евролик узоқ муддатли кредитлар ажратади. Бу ҳақда Spot хабар бермоқда.

Маблағлар Тошкент шаҳри, Хорзам ва Наманган вилоятларида сув ва иссиқлик, Навоий вилоятида электр энергияси таъминотини яхшилашга сарфланади.

«Ўзбекистонда салкам 33 миллион киши истиқомат қилади. Бироқ Марказий Осиёнинг аҳолиси энг кўп давлати ўнлаб йиллар давомида коммунал соҳага етарлича инвестиция киритилмаганидан азият чекиб келган», дейилади банк матбуот хизмати хабарида.

Маълумот учун, Европа тикланиш ва тараққиёт банки шу кунгача Ўзбекистон иқтисодиётига 61 та лойиҳа доирасида 9,3 миллиард евро ажратди.