Шавкат Мирзиёев Ўзбекистонга МДҲ давлатлари мудофаа вазирлари кенгашининг навбатдаги мажлисида иштирок этиш учун келган делегация раҳбарларини қабул қилди. Бу ҳақда Президент матбуот хизмати хабар берди.
Учрашувда Россия, Қозоғистон, Беларусь, Тожикистон, Озарбайжон ва Арманистон мудофаа вазирлари, Қирғизистон қуролли кучлари бош штаби бошлиғи ва МДҲ мудофаа вазирлари кенгаши котиби иштирок этди.
Давлат раҳбари меҳмонларни самимий қутлар экан, Тошкентда илк бор МДҲ мудофаа вазирлари кенгаши мажлиси ўтказилиши мамлакатнинг Ҳамдўстлик фаолиятидаги иштироки янги босқичга ўтганидан далолат беришини таъкидлади.
Мулоқот давомида МДҲ доирасида ҳарбий ва ҳарбий-техник ҳамкорлик, жумладан, вазирликлараро шериклик, икки ва кўп томонлама тадбирлар ўтказиш, ҳарбий кадрларнинг профессионал тайёргарлиги борасидаги алоқаларни янада кенгайтириш масалалари кўриб чиқилди.
Шунингдек, халқаро ва минтақавий сиёсатнинг долзарб йўналишлари, жумладан, хавфсизлик ва барқарорликни таъминлаш масалалари юзасидан фикр алмашилди.
Учрашув якунида Ўзбекистон Президенти МДҲ мудофаа вазирлари кенгаши мажлиси ишига муваффақият тилади.
Изоҳ (0)