Самарқанд шаҳрининг айрим ҳудудларидаги газ тармоғида камчиликлар аниқланди

Жорий йилнинг 12 июлдаги «Республика иқтисодиёти тармоқлари ва ижтимоий соҳаларини 2018/2019 йиллар куз-қиш даврида барқарор ишлашга комплекс тайёрлашни таъминлаш чора-тадбирлари тўғрисида»ги қарорида белгиланган вазифалар ижроси ўрганилган. Бу ҳақда «Zarnews.uz» хабар бермоқда.

«Ўрганишлар давомида Самарқанд шаҳрининг айрим ҳудудларида бу ишда қатор камчиликлар мавжудлиги ойдинлашди. Жумладан, газ тармоқларини мукаммал таъмирлаш бўйича шаҳарнинг Беруний кўчасидан Гагарин кўчасигача бўлган 0,9 километр узунликдаги ўрта босимли ер ости газ қувурини мукаммал таъмирлаш ишлари жорий йилнинг 2—3-чоракларида якунланиши режалаштирилган бўлса-да, бу ишларни бажаришга ҳалигача киришилмаган. Даҳбед кўчасидан Сиёб бозори ҳудудигача бўлган 0,3 километр узунликдаги ўрта босимли ерости газ қувурини мукаммал таъмирлаш ишлари июнь ойида якунланиши белгилангани ҳолда таъмирлаш ишларини иссиқ-илиқ кунларда бажаришга киришиш газчиларнинг хаёл кўчасидан ҳам ўтгани йўқ»,—дейилади хабарда.

«Газ тармоқларини реконструкция қилиш бўйича белгиланган ишлар ҳақида ҳам шундай хулосага келиш мумкин. Шаҳарнинг Муқимий кўчасидан Нодир Девонбеги кўчасигача 0,3 километр узунликдаги, Мулиён-1 маҳалласидан Термиз кўчасигача 0,4 километр узунликдаги, Боғи Мирзо маҳалласидан Термиз кўчасигача бўлган 1,5 километр узунликдаги ўрта босимли ерости газ қувурларини реконструкция қилиш ишлари, мана, қиш остона ҳатлаётган бўлса-да, умуман бошланмаган. Ахир ушбу газ қувурларидан қанча аҳоли, ижтимоий соҳа объектлари фойдаланади. Қишнинг қировли кунларида бу газ қувурларида носозлик сезилса, аввало, аҳоли совуқда газсиз қолади, қолаверса, уни таъмирлаш газ ходимлари учун икки ҳисса қийинчилик келтириб чиқаради», — дейди «Ўздавнефтгазинспекция» вилоят бўлими бош технологи.

Хонадонларни табиий газ билан таъминлашда газ тақсимлаш қутиларининг ўрни катта. Шу боис уларни мавсум олдидан тўлиқ назоратдан ўтказиш шарт. Аммо бугунги кунгача шаҳардаги профилактикадан ўтказилиши белгиланган 2161 дона газ тақсимлаш қутисининг 351 тасида бу ишлар бажарилмаган. Назорат ва текширишдан ўтказилган газ тақсимлаш қутиларининг айримларида эса эшиклар носоз, қулф қўйилмаган, газ босимини ўлчаш манометрлари йўқ, профилактика ишлари қониқарсиз бажарилган», —дейди Икром Maxсумов