«Ҳидоя» мадрасаси фахрий имоми Абдулатифхон махдум вафот этди

1991 йилдан «Ҳидоя» мадрасасида кўп йиллар тафсир илмидан дарс берган Абдулатифхон махдум домла вафот этди, дея Islom.uz Telegram канали хабар берди.

Абдулатифхон домла 1930 йилда Наманган шаҳрида таваллуд топдган. 1952 йилда Мир Араб мадрасасига ўқишга кирган. Сўнгра Тошкентдаги Бароқхон мадрасасида тўрт йил таълим олган. Бу давр мобайнида, тафсир ва фиқҳни чуқур ўрганган. Мадрасани тугаллагач, Мир Араб мадрасасида араб тилидан сабоқ берган. 1960—1962 йилларда Сурия Давлат университетининг шариат факультетида Шайх Муҳаммад Амин Мисрий, Шайх Мустафо Аҳмад Зарқо, Ҳишом Бурҳоний каби ислом оламининг таниқли олимларидан таҳсил олган. 1963—1968 йилларда Бухоро шаҳридаги Мир Араб мадрасасида мударрис ва илмий мудир вазифасида фаолият юритган. 1968—1972 йилларда эса мадраса мудири бўлган.

Абдулатифхон домла 1973 йилда Наманганга қайтиб Шайх Эшон жоме масжидида (1977–1980), кейинчалик Maxмуд Эшон масжидида имом-хатиб бўлди. 1991 йилда Наманганда «Мулла Қирғиз» (ҳозирги «Ҳидоя») мадрасаси очилганидан кейин, кўп йиллар ушбу даргоҳда тафсир илмидан дарс берган.

Абдулатифхон домла дин, халқ учун кўплаб шогирдлар тайёрлаб, тарбия қилган.

Абдулатифхон махдум нафақадаги, фахрий имом эди.

«Жаноза пешин намозидан сўнг Наманган шаҳридаги Мулла Эшон жоме масжидида бўлиб ўтади. Иннаа лиллааҳи ва иннаа илайҳи рожиъун»— дейилади хабарда.