Ботиржон Асадов Ўзбекистоннинг Россиядаги Фавқулодда ва мухтор элчиси этиб тайинланди. Бу ҳақда ТИВ матбуот хизмати маълум қилди.
8 октябрь куни Россия Ташқи ишлар вазири ўринбосари Григорий Карасин Ўзбекистоннинг янги элчисидан ишонч ёрлиқларини қабул қилиб олди. У Асадовни элчи лавозимини эгаллагани билан қутлаб, икки давлат ўртасидаги стратегик ва иттифоқдошлик алоқаларини мустаҳкамлашда муваффақият тилади.
Томонлар Россия—Ўзбекистон муносабатлари кун тартибидаги долзарб масалалар юзасидан фикр алмашди. Бунда Россия президенти Владимир Путиннинг октябрь ойида Ўзбекистонга амалга оширадиган давлат ташрифига тайёргарликка алоҳида эътибор қаратилди.
Ботиржон Асадов жорий йил 5 февралидан Ташқи ишлар вазири Абдулазиз Комиловнинг биринчи ўринбосари сифатида фаолият юритиб келаётганди. У турли йилларда Ўзбекистоннинг Жанубий Кореядаги элчиси, Савдо-саноат палатаси раиси ўринбосари вазифаларида ишлаган.
Эслатиб ўтамиз, Ўзбекистоннинг Россиядаги элчиси Баҳром Ашрафхонов сентябрь ойида Алишер Султонов ўрнига «Ўзбекнефтгаз» АЖ бошқаруви раиси лавозимини эгаллаганди.
Изоҳ (0)