Самарқанд вилоятининг Паяриқ тумани, «Гулзор» МФЙда яшовчи М.Жўрақулова коммунал тўловларни мунтазам ойма-ой тўлаб боришга ҳаракат қиларди. Бу ҳақда ЎзА хабар берди.
Мажбурий ижро бюроси туман бўлими ходимлари бу гал унинг хонадони электр энергиясидан 7397564,90 (етти миллион уч юз тўқсон етти минг сўмдан зиёд) сўм қарздор эканини айтишганда ва бу қарз зудлик билан тўланмаса, чора кўрилиши ҳақида огоҳлантиришганда, дастлаб нима қилишини билмай қолди.
Яқинларининг маслаҳати билан Истеъмолчилар ҳуқуқларини ҳимоя қилиш жамиятлари федерациясининг қисқа рақамли ишонч телефонига мурожаат қилди.
Ушбу мурожаат вилоят ҳудудий бирлашмасининг Паяриқ туман жамияти мутасаддилари томонидан ўрганиб чиқилди. Қайта хатлов ўтказилганда, Паяриқ туман ETКА базаси бўйича, ушбу хонадонда қарздорлик мавжуд эмаслиги, аксинча, 232 751 (икки юз ўттиз икки мингдан зиёд) сўм ортиқча тўлови борлиги аниқланди.
Юкланган қарздорлик бекор қилиниб, фуқаронинг бузилган ҳуқуқлари тикланди.
Изоҳ (0)