Ёшлар иттифоқи марказий кенгашининг «Ёш дизайнерлар кенгаши» нодавлат нотижорат ташкилоти дизайнерлари 19—25 сентябрь кунлари Италияда Милан мода ҳафталиги доирасида ўтказилган намойишларда иштирок этди. Бу ҳақда «Дарё»га Ёшлар медиа маркази маълум қилди.
Ҳафталикда Италия, Франция, Германия, Польша, Озарбайжон, Қозоғистон, Қирғизистон ва бошқа давлатлардан келган дизайнерлар ўз кўргазмалари билан қатнашди.
Мазкур ҳафталикда Ўзбекистон номидан «Анор» модалар уйи ва Image лойиҳаси иштирокчиси, IZY бренди асосчиси Зарина Исмадиёрова иштирок этди.
«Анор» модалар уйи ўзининг асосий йўналишига содиқ қолган ҳолда миллий матолардан нео-фольклор йўналишидаги янги тўпламини тақдим этди. Қадимий паранжи деталларидан унумли фойдаланилган тўплам меҳмонлар ва ҳамкорларда катта таассурот қолдирди.
IZY бренди эса янгича, «авангард стрит стайл» йўналишидаги тўпламини тақдим этди. Ушбу йўналиш Италия бутиклари ва шоу-румлари раҳбарларига маъқул келди ва ҳамкорликда ишлаш таклифлари кўриб чиқилди.
«Ёш дизайнерлар кенгаши» томонидан ўзбекистонлик дизайнерларнинг Берлин, Сербия мода ҳафталиклари ва бошқа тадбирлардаги иштироки юзасидан шартномалар тузилди.
Изоҳ (0)