18—19 октябрь кунлари Ўзбекистонга Россия президенти Владимир Путиннинг ташриф буюриши кутилмоқда, деб ёзади «Подробно». Ўзбекистон Президенти Шавкат Мирзиёев билан учрашувда улар қандай мавзуларни муҳокама қилиши ҳозирча номаълум. Россиялик таниқли тарихчи ва сиёсатшунос Олег Кузнецов бу шунчаки дипломатик ташриф бўлмаслигини айтди.
«Шу нарса ўзига диққатни тортадики, унинг Ўзбекистонга сафари Бокудан бошланиб, сўнг Душанбега давом этадиган поссовет давлатлари пойтахтларига сафарлари кетма-кетлигидан ўрин олган. Бу Россиянинг Арманистон, Грузия ва Украина каби поссовет мамлакатларидаги позицияси нол белгисигача тушиб кетган бир пайтда юз бермоқда. Буларнинг барчаси ўз қўшниларини ким дўст, ким душманлигини аниқлаш мақсадида текшириб кўришга ўхшайди. Шунинг учун бу ташрифнинг аниқ белгиланган сиёсий ва ҳатто геосиёсий мазмуни ҳам йўқ», — деди Олег Кузнецов.
«Россия силлиққина, аммо қатъий равишда Европадан сиқиб чиқарилгач, Путин турк-ислом дунёсидан ўзига янги иттифоқдошлар қидиришга мажбур», — деди у. Экспертнинг таъкидлашича, расмий Москва турк цивилизацияси мамлакатлари билан алоқанинг янги контурларини топишга уриняпти, бу (алоқа) Борис Елцин президентлиги даврида Россия томонидан бир томонлама тартибда рад этилган эди.
«Москва йўқотилган ишончни қайта тиклаш йўлларини қидирмоқда ва буни энг ҳалол йўл — иқтисодиёт ва савдони ривожлантириш орқали амалга оширяпти, бу барча томонларга яқин, тушунарли ва қизиқ бўлган нарса. Савдода катта ва кичик йўқ, фақат тенг ҳуқуқли томонлар бор, Кремль буни аллақачон тушунди ва шу сабабли анча вақтдан буён ўзига бўлган ишончни сиёсат эмас, балки иқтисодиёт орқали тиклаб келмоқда», — дея хулоса қилди Олег Кузнецов.
Изоҳ (0)