18—19-oktabr kunlari O‘zbekistonga Rossiya prezidenti Vladimir Putinning tashrif buyurishi kutilmoqda, deb yozadi “Podrobno”. O‘zbekiston Prezidenti Shavkat Mirziyoyev bilan uchrashuvda ular qanday mavzularni muhokama qilishi hozircha noma’lum. Rossiyalik taniqli tarixchi va siyosatshunos Oleg Kuznetsov bu shunchaki diplomatik tashrif bo‘lmasligini aytdi.
“Shu narsa o‘ziga diqqatni tortadiki, uning O‘zbekistonga safari Bokudan boshlanib, so‘ng Dushanbega davom etadigan postsovet davlatlari poytaxtlariga safarlari ketma-ketligidan o‘rin olgan. Bu Rossiyaning Armaniston, Gruziya va Ukraina kabi postsovet mamlakatlaridagi pozitsiyasi nol belgisigacha tushib ketgan bir paytda yuz bermoqda. Bularning barchasi o‘z qo‘shnilarini kim do‘st, kim dushmanligini aniqlash maqsadida tekshirib ko‘rishga o‘xshaydi. Shuning uchun bu tashrifning aniq belgilangan siyosiy va hatto geosiyosiy mazmuni ham yo‘q”, — dedi Oleg Kuznetsov.
“Rossiya silliqqina, ammo qat’iy ravishda Yevropadan siqib chiqarilgach, Putin turk-islom dunyosidan o‘ziga yangi ittifoqdoshlar qidirishga majbur”, — dedi u. Ekspertning ta’kidlashicha, rasmiy Moskva turk sivilizatsiyasi mamlakatlari bilan aloqaning yangi konturlarini topishga urinyapti, bu (aloqa) Boris Yelsin prezidentligi davrida Rossiya tomonidan bir tomonlama tartibda rad etilgan edi.
“Moskva yo‘qotilgan ishonchni qayta tiklash yo‘llarini qidirmoqda va buni eng halol yo‘l — iqtisodiyot va savdoni rivojlantirish orqali amalga oshiryapti, bu barcha tomonlarga yaqin, tushunarli va qiziq bo‘lgan narsa. Savdoda katta va kichik yo‘q, faqat teng huquqli tomonlar bor, Kreml buni allaqachon tushundi va shu sababli ancha vaqtdan buyon o‘ziga bo‘lgan ishonchni siyosat emas, balki iqtisodiyot orqali tiklab kelmoqda”, — deya xulosa qildi Oleg Kuznetsov.
Izoh (0)