Фарғонада еттита нодавлат мактабгача таълим муассасаси фойдаланишга топширилди. Бу ҳақда «Дарё» мухбири Азизжон Эрматов хабар берди.
Ёзёвон туманининг «Баҳор» ҳамда «Истиқлол» маҳаллаларида «Бойчечак» ва «Мустафошоҳ» нодавлат мактабгача таълим муассасалари иш бошлади. Бу муассасаларда болалар ўзбек ва рус тилларида таълим-тарбия олади.
Хоналар миллий қадриятларни акс эттирувчи ва болаларни китоб ўқишга қизиқтирувчи ўқув-методик жиҳозлар, одоб-ахлоққа ўргатувчи ўйинлар ва ўйинчоқлар, бадиий адабиётлар билан таъминланган. Мусиқа хонаси, тиббиёт хонаси, ошхона ва бошқа хоналарда яратилган шароитлар ҳам замон талабларига тўла жавоб беради.
Тошлоқ туманининг «Яккатут» ҳамда «Ҳуррият» маҳаллаларида 2 та, Ўзбекистон туманининг Янгиҳаёт қишлоғида, «Қумбости» ва «Шодлик» маҳаллаларида 3 та давлат-хусусий шериклик асосидаги нодавлат мактабгача таълим муассасалари очилди.
Айни пайтда Фарғона вилоятида мавжуд 770 давлат мактабгача таълим муассасасига 108 минг нафардан ортиқ боғча ёшидаги болалар қамраб олинган.
Бундан ташқари, вилоятда 170 га яқин нодавлат мактабгача таълим муассасаси ва оилавий уй боғчалари фаолият юритмоқда. Уларга 8 минг нафардан ортиқ кичкинтойлар жалб этилган.
Мактабгача таълим тизимини ривожлантириш бўйича «Йўл харитаси»га кўра жорий йил якунига қадар вилоятда давлат-хусусий шериклик асосида 301 та нодавлат мактабгача таълим муассасаси очиш режалаштирилган.
Изоҳ (0)