Эрон Марв (Туркманистон) ва Душанбе (Тожикистон) шаҳарларига темирйўл қатновларини йўлга қўймоқчи. Бу ҳақда Эрон миллий темирйўл компанияси бош директори Жаббор Али Закарий хабар берди.
Янги йўналишлар Эроннинг транспорт инфратузилмасини замонавийлаштириш ва минтақавий ҳамкорликни кучайтириш стратегиясининг бир қисми ҳисобланади.
Беш йиллик танаффусдан сўнг Теҳрон — Ван (Туркия) йўналиши қайта ишга туширилди. Шунингдек, Туркманистоннинг Марв ва Тожикистоннинг Душанбе шаҳарлари билан темирйўл алоқасини ўрнатиш бўйича тайёргарлик ишлари олиб борилмоқда, деди Закарий.
У Эронни Туркия, Афғонистон ва Марказий Осиё мамлакатлари билан боғлайдиган иккита янги темирйўл йўналиши тез орада ишга туширилишини айтди. Янги йўналишлардан бири Теҳронни Анқара билан боғлайди, у яқин икки ой ичида фаолиятини бошлайди. Иккинчиси эса Теҳрон—Ҳирот йўналиши бўлиб, келаси ой охиригача ишга тушади.
Бу йўналишлар одамлар ва товарларни ташиш, савдо ва инвестиция соҳаларида стратегик лойиҳаларни амалга ошириш учун янги имкониятлар очади. Бунда сайёҳлик поездларини ривожлантириш муҳим ҳисобланади.
Эрон темирйўл тармоғи бой тарихий ва маданий меросга эга ва ушбу салоҳиятдан туризм учун фойдаланиш катта даромад келтириши, шунингдек, меҳмондўстлик соҳасида янги иш ўринларини яратиши мумкин, деди Закарий.
У Эронда ҳар йили 150 дан 300 километргача янги темирйўллар қурилиши, аммо тармоқнинг тўлиқ ишлаши учун ҳаракатланувчи таркибни янгилаш зарурлигини айтди. 2025 йилда мамлакатга 300 та янги йўловчи вагони олиб келинади.
Шунингдек, Хитой томони билан янги вагонларни етказиб бериш бўйича шартнома имзоланди, деди компания раҳбари.
Ҳозирда Тожикистон ва Эрон ўртасида тўғридан тўғри ҳаво қатнови мавжуд. Somon Air ва Varesh Airline Душанбе ва Теҳрон ўртасида парвозларни амалга оширади, Эрон авиакомпанияси эса Машҳад ва Душанбедан ортга ҳам парвоз қилади.
Изоҳ (0)