28 сентябрь куни Остона шаҳрида «Ривожланиш мақсадида савдо ва инвестицияларни тарғиб этиш: Евросиё нигоҳи» мавзусидаги юқори даражадаги форум давомида Ўзбекистон ташқи савдо вазири Жамшид Хўжаев Жаҳон савдо ташкилоти бош директори Роберт Азеведу билан музокаралар ўтказди. Бу ҳақда вазирлик матбуот хизмати хабар берди.
Форумнинг мақсади – инвестицияларга кўмаклашиш соҳасида ЖСТнинг янги қоидалари бўйича мулоқотни тарғиб этиш.
Музокаралар давомида Жамшид Хўжаев ва Роберту Азеведу Ўзбекистон Республикасининг ЖСТ билан ҳамкорлик масалаларини муҳокама қилди. Жумладан, Ўзбекистоннинг ушбу ташкилотга аъзо бўлиши учун керакли ҳужжатларни тайёрлаш, республика вакилларининг ташкилот тадбирларида иштирокини кенгайтириш ва кун тартибидаги бошқа масалалар.
Эслатиб ўтамиз, Ўзбекистоннинг ЖСТга аъзо бўлиши жараёнининг давом эттирилиши Ўзбекистон Республикаси Президенти Шавкат Мирзиёев томонидан 2017—2021 йилларда Ўзбекистон Республикасининг Ҳаракатлар стратегиясида давлатнинг савдо-иқтисодий соҳасида ривожланишнинг устувор йўналишларидан бири сифатида белгиланган.
Изоҳ (0)