Зайнаб Холдорова (исм-шарифлар ўзгартирилган) анчадан буён Сергелида қурилаётган арзон уй-жойлардан олмоқчи бўлиб юрганди. Бу ҳақда «Халқ сўзи» хабар бермоқда.
Унга таниши Меҳри Сатторова Баҳром исмли таниши борлигини айтиб, шу йигит билан гаплашиб кўришни маслаҳат берди. Шунингдек, унинг телефон рақамини ҳам ёзиб берди. Зайнаб Холдорова кечки пайт Баҳромга қўнғироқ қилди. Ўзини таништириб, телефон рақамини Меҳридан олганини, арзонлаштирилган уйлардан олишда ёрдам беришини илтимос қилди.
Аёл Баҳром муқаддам беш марта айнан фирибгарлик жинояти учун судланганлиги, ҳайдовчилик орқасидан рўзғор тебратаётгани, айни пайтда автомашинасини таъмирлатишга пул қидираётганини қаёқдан ҳам билсин. Шу боис, бу қўнғироқ Баҳром учун айни муддао бўлди. У ўзи билганича бунинг учун қандай ҳужжатлар керак бўлишини санаб ўтиб, бу ишни 1000 АҚШ долларига ҳал қилиб бериши ҳақида лоф урди. Шунингдек, буни Меҳрининг ҳурмати учун эканлигини ҳам гап орасида қистириб ўтди. З.Холдорованинг розилигини олгач, эртаси куни барча ҳужжатлар билан 600 доллар олиб келишини тайинлаб, қолганини иш битганидан кейин олишини билдирди.
Бу жавобдан оғзи қулоғига етган З.Холдорова вақтни ўтказмай М.Сатторовага телефон қилди ва Баҳром атиги 1000 долларга уй олиб беришда кўмаклашишга рози бўлганини айтиб, унга миннатдорчилик билдирди. М.Сатторова аввалига унинг хурсандчилигига шерик бўлди. Бироқ, бу иш қонунга хилоф эканлиги ҳақида ўйлаб қолди. Қолаверса, бу савдонинг бир учида ўзи турибди. Меҳри кўнглидаги шубҳани Зайнабга айтган эди, у ҳам ўйланиб қолди.
Хуллас, икки дугона гапни бир ерга қўйиб, бу ҳақда тегишли органларга мурожаат қилди. Эртаси куни Баҳром Дўсматов З.Холдоровадан ҳужжатларнинг нусхалари билан 600 АҚШ долларини олган пайтда қўлга олинди.
Суд томонидан унинг қилмишига яраша жазо тайинланди.
Изоҳ (0)