Самарқанд шаҳрида жойлашган 37-сонли мактабгача таълим муассасасида «Маънавий юксалиш ва ватанпарварлик куни» муносабати билан Самарқанд гарнизони Маънавият ва маърифат маркази томонидан концерт дастури уюштирилди. Бу ҳақда Мудофаа вазирлиги матбуот хизмати «Дарё»га маълум қилди.
Унда Марказий ҳарбий округ вакиллари, округ фахрийлар ишлари бўйича кенгаш раиси Ўлмас Шодиев, вилоят мактабгача таълим бошқармаси ходимлари иштирок этди.
Тадбир давомида болажонлар ўртасида шахмат-шашка, расм чизиш каби турли кўнгилочар мусобақалар ўтказилди. Ўз қобилиятини намойиш этган болаларга эсдалик совғалари улашилди.
Шунингдек, Жиззах вилоятидаги ҳарбий қисмлардан бирида ҳарбий хизматчилар билан китобхонликка бағишланган учрашув бўлиб ўтди. Унда Ўзбекистонда хизмат кўрсатган артист, кинорежиссёр Жўра Исроилов, актёр Гулмурод Худойназаров, Ўзбекистон ёзувчилар уюшмаси Жиззах вилояти аъзоси Сайфиддин Аконов қатнашиб, йиғилганлар билан самимий суҳбат уюштирди.
Жиззах вилояти касаба уюшмаси томонидан ҳарбий хизматчиларга 150 дан ортиқ жаҳон ва ўзбек адабиёти дурдона асарлари совға қилинди. Бундан ташқари табир доирасида ҳарбий хизматчиларнинг оила аъзолари учун ҳарбий қисмда жойлашган кутубхона бўйлаб экскурсия ташкил этилди.
Изоҳ (0)