Албатта, 40 ёшда кексалик бирданига келмайди, лекин ёшга оид ўзгаришлар кўпроқ сезила бошлайди. Масалан, биринчи марта кўриш қобилиятининг пасайиши ёки соч тўкилиши билан дуч келишингиз мумкин. Шунингдек, турли хил ёшга хос касалликларга чалиниш эҳтимоли ҳам ортади. Шунинг учун бу ёшда саломатлигингизга кўпроқ эътибор қаратишингиз лозим.
1. Ҳафтада камида уч марта спорт билан шуғулланинг
Тренажёр залига бориш шарт эмас, аммо жисмоний фаоллик муҳим. Югуриш, ёга, сузиш, скандинавча юриш — ўзингизга ёққан ва қўлингиздан келадиганини танланг. Спорт мушаклар ва юракни мустаҳкамлайди, артрит ва юрак етишмовчилиги каби касалликлар хавфини камайтиради. Шунингдек, жисмоний машқлар гипертония ва 2-тур қандли диабетга олиб келиши мумкин бўлган ортиқча вазнни йўқотишга ёрдам беради. Спорт пайтида эндорфинлар ишлаб чиқарилади — булар кайфиятни кўтаради ва стрессни пасайтиради. Бундан ташқари, жисмоний фаоллик баъзан ўзига бўлган ишончга таъсир қилади: соғлом ва бақувват танада ўзимизни кўпинча ишончлироқ ҳис қиламиз.
2. Суткасига ўртача 7–9 соат ухланг
Яхши уйқу хотира ва диққатни яхшилайди, 2-тур қандли диабет ва гипертония хавфини камайтиради, соғлом вазнни сақлашга ёрдам беради. Шифокорлар тўлақонли дам олиш учун катталарга суткасига 7–9 соат ухлашни тавсия этадилар. Қоронғилик ҳам муҳим аҳамиятга эга. Тунда уйқуни бошқарувчи гормон — мелатонин миқдори ошади. Шу сабабли қалин пардалардан фойдаланинг ва ётоқхонада гаджетлар бўлмасин: экраннинг кўк нури мелатонин ишлаб чиқарилишини тўхтатади, натижада уйқуга кетиш қийинлашади.
3. Тўлақонли овқатланинг
Дуч келган овқатни шунчаки еб кетиш яхши эмас. Ёдингизда бўлсин, овқат сизга қувват беради ва миянгизнинг яхшироқ ишлашига ёрдам беради. Кунига камида уч маҳал сифатли овқатланишга эътибор қаратинг. Яхши кайфият учун таомлар хилма-хил бўлиши, оқсиллар, ёғлар ва углеводлар мавжуд бўлиши муҳим. Бундан ташқари, ҳар куни камида 400 грамм сабзавот ва мева истеъмол қилишга ҳаракат қилинг.
4. Руҳий саломатлик ҳам эсдан чиқмасин
Сурункали стресс кортизол даражасини оширади, бу эса юрак-қон томир тизими ва руҳий саломатликка зарар етказади. Ташқи таъсирларни тўлиқ назорат қилиш ва ҳеч нарсадан ташвишланмаслик имконсиз. Бироқ баъзи нарсаларни амалга ошириш мумкин. Медитация, нафас олиш машқлари ва ҳатто севимли машғулотлар ҳам бир оз бўшашишга ва ўзингизни хотиржам ҳис қилишга ёрдам беради. Бундан ташқари, жисмоний фаоллик кортизол даражасининг пасайишига кўмаклашади. Бунда машғулотдан кейинги таъсир бир неча соат давомида сақланиб қолади. Ўзингизни қўшимча стресс манбаларидан асрашга ҳаракат қилинг: янгиликлар лентасини доимий равишда кузатишни тўхтатинг ва зарарли одамлар билан мулоқотни иложи борича камайтиринг.
5. Ижтимоий фаолликни қўллаб-қувватлаш
Оилавий сайрлар уюштиринг, дўстлар билан учрашинг ва жамоат тадбирларида қатнашинг — бу сизга ижобий кайфият бағишлайди ва ҳаётингизни янада мазмунли қилади. Агар учрашувлар ва янги танишувларни бошлаш қийин бўлса, бошқа одамлар билан мулоқот қиладиган севимли машғулот топинг. Китобхонлар тўгараги, рақс курслари ёки театр устахонасига ёзилишингиз мумкин — бу албатта мулоқот доирангизни кенгайтиради.
6. Мияни машқ қилдиринг
Мунтазам ўрганиш мия фаолиятини рағбатлантиради, нейрон алоқаларини мустаҳкамлайди ва когнитив бузилишлардан ҳимоя қилади. Бундан ташқари, янги севимли машғулотни синаб кўринг: масалан, машина ҳайдашни, гитара чалишни ёки расм чизишни ўрганинг. Мияни машқ қилдириш фикрлаш мослашувчанлигини ривожлантиришга ёрдам беради: бу янги шароитлар, технологиялар ва вазиятларга осонроқ мослашишингизни таъминлайди. Шунингдек, иш вазифалари ва муаммоларни енгишда ҳам қўл келади.
Изоҳ (0)