Тошкент шаҳар ҳокимлигида 15 сентябрь куни навбатдаги «Инвесторлар куни» бўлиб ўтди, дея хабар бермоқда ҳокимлик матбуот хизмати. Унда Тошкент шаҳар ҳокими вазифасини бажарувчи Жаҳонгир Ортиқхўжаевдан ташқари Ўзбекистон бош вазири Абдулла Арипов ҳам 40 дан ортиқ лойиҳалар билан танишган.
«Мазкур лойиҳалар ижтимоий соҳа объектлари, хусусан замонавий меҳмонхона, кутубхона, тиббиёт марказлари, савдо ва кўнгил очар масканлар, кўп қаватли автотураргоҳлар ҳамда янги уй-жой комплексларини барпо этишни кўзда тутади», — дейилади Тошкент шаҳар ҳокимлиги ахборотида.
Тадбирда Inter Aviaservis компанияси асосчиси Жаҳонгир Файзуллаев Тошкентда янги авиакомпания очиш таклифини илгари сурган. Тадбиркор кўп йиллар давомида авиалайнерлар бозорини ўрганиб, чипталарни сотиш, парвозлар ва йўналишлар сонини ўрганиб чиққан.
Унинг сўзларига кўра, хорижий компаниялар билан А-320 ва А-321 самолётларини лизинг асосида сотиб олиш бўйича шартномалар мавжуд. «Жаҳонгир Ортиқхўжаев инвесторнинг таклифини қўллаб-қувватлаб, ҳокимиятдан барча зурур кўмак берилишини таъкидлади», — дейилади хабарда.
Қайд этишларича, учрашувда тақдим этилган лойиҳаларнинг умумий қиймати 5 триллион сўмдан зиёд бўлиб, уларнинг амалга оширилиши 10 мингга яқин янги иш ўрни яратилишини таъминлайди. «Тадбирда лойиҳаларнинг қарийб 90 фоизи маъқулланди», — деб ёзади ҳокимлик матбуот хизмати.
Изоҳ (0)