Тошкент ДСБ томонидан ўтказилган профилактик тадбирлар жараёнида фаолиятини вақтинча тўхтатган тадбиркорлик субъектларининг фаолиятини қайта тиклаш ва янги тадбиркорларни давлат рўйхатидан ўтказиш ҳисобига жорий йилнинг 7 ойи давомида якка тартибдаги тадбиркорлар сони 3 791 нафарга кўпайди. Бу ҳақда бошқарма Жамоатчилик билан алоқалар ва ҳуқуқий ахборот бўлимига таяниб, «Газета.uz» хабар бермоқда.
Шу билан биргаликда, ушбу тадбиркорлик субъектларида ёлланма ишчи сифатида ишлаётган 2 091 нафар фуқаронинг фаолияти қонунийлаштирилди. Натижада бюджетга 11,1 миллиард сўм қўшимча манбалар жалб этилиши таъминланди.
Бу кўрсаткич сўнгги икки ойда янада юқорилади. Хусусан, июнь—июль ойларида Тошкент шаҳрида ўтказилган профилактик тадбирлар натижасида 1 819 нафар фуқаро якка тартибдаги тадбиркор сифатида давлат рўйхатидан ўтказилди. Шунингдек, фаолиятини вақтинча тўхтатган 1 191 нафар якка тартибдаги тадбиркор фаолияти қайта тикланди. Уларда ёлланма ишчи сифатида ишлаётган 1 017 нафар фуқаронинг фаолияти қонунийлаштирилди. Натижада бюджетга 4,3 миллиард сўм қўшимча манбалар жалб этилиши таъминланди.
Жумладан, пойтахтнинг Учтепа туманида ўтказилган профилактик тадбирлар жараёнида фуқаро Ғайратжон Хожиакбаров ҳудудда жойлашган «Назарбек темир савдо» бозорида қурилиш моллари савдосини йўлга қўйгани, ҳужжатларни эса расмийлаштирмагани аниқланди.
Худди шунингдек, фуқаро Феруза Холмуратова ҳам Бектемир тумани Тошкент ҳалқа автомобиль йўли кўчаси 6-уйда жойлашган «Кўкламги водий» МЧЖга қарашли савдо дўконида ҳеч қандай ҳужжатларсиз тадбиркорлик фаолиятини бошлаган.
Тадбирлар натижасида ушбу фуқароларга расмий огоҳлантириш берилди ҳамда тадбиркор сифатида рўйхатдан ўтиши учун амалий ёрдам кўрсатилди. Ҳозирги вақтда улар давлат рўйхатидан ўтиб, тадбиркорлик фаолиятини давом эттирмоқда.
Изоҳ (0)