Шовот тумани «Янгитурмуш» маҳалласида яшовчи фуқаро М.К. Департаментнинг Хоразм вилоят Шовот туман бўлимига ариза билан мурожаат қилди. Бу ҳақда Бош покуратуранинг иқтисодий жиноятларга қарши курашиш департаментининг Хоразм вилояти бошқармаси матбуот хизмати хабар бермоқда.
Унда кўрсатилишича «Қиёт» қишлоғида истиқомат қилувчи фуқаро Р.О. унинг тадбиркорлик фаолиятини йўлга қўйиш истагида юрганлигидан хабар топиб, унга шу қишлоқдан 600 квадрат метр ер майдони ажратилишида туман архитектура ва қурилиш бўлимида ишловчи мансабдор танишлари орқали ёрдам беришини айтган. Бу ишларни битириш учун эса олдиндан 7 миллион сўм ва эгалик ҳуқуқи белгилаш тўғрисидаги қарор чиқартирилгандан кейин яна 3 миллион сўм, жами 10 миллион сўм пул беришини талаб қилган.
Шунга асосан, аризачининг мурожаати юзасидан 13 август куни департаментнинг Хоразм вилоят бошқармаси ва Шовот туман бўлими ходимлари томонидан тезкор тадбир ўтказилди.
Тезкор тадбирда Шовот тумани «Тупроққалъа» маҳалласида яшовчи фуқаро Р.О ҳамқишлоғига ваъда қилган ер майдони учун сўралган пулнинг 5 миллион сўмини олаётган пайтда департамент ходимлари томонидан ашёвий далиллар билан қўлга олинди.
Ҳозирда мазкур ҳолат юзасидан департаментнинг Шовот туман бўлими томонидан терговга қадар текширув ҳаракатлари ўтказилмоқда.
Изоҳ (0)