Ўзбекистон Қуролли Кучлари академияси бошлиғи Telegram орқали мурожаатларни қабул қилади

Ўзбекистон Қуролли Кучлари академиясининг Telegram’даги @Qurolli_Kuchlar_Akademiyasi_bot номли расмий боти ишга тушган бўлиб, фуқаролар ўзининг мурожатларини ушбу манзилга юбориши мумкин. Бу ҳақда Мудофаа вазирлиги матбуот хизмати «Дарё»га маълум қилди.

Шунингдек, Қуролли Кучлари академиясининг akademiya-mudofaa.uz манзили бўйича расмий сайти ҳам ишга туширилди. Айни вақтда сайт синов режимида иш олиб бормоқда.

Веб-сайт Қуролли Кучлар академияси фаолияти очиқлигини таъминлаб, таълим муассаса ҳаётига боғлиқ тадбирлар ва ҳодисаларни тезкорлик билан ёритиш, шунингдек, жамоатчилик билан алоқаларни яхшилашга хизмат қилади.

Сайтда академия раҳбарияти, унинг тузилмаси ва тарихи ҳақидаги ахборотлар, бўш иш ўринлари, ҳарбий-илмий ишлар ҳақида батафсил маълумотлар билан танишиш мумкин.

Қуролли Кучлар академиясига экскурсия уюштиришни истаган ўқувчи ёшлар гуруҳлари учун ҳам янги имконият пайдо бўлди. Энди ташриф буюрувчиларнинг аризалари Telegram ҳамда сайтдаги электрон манзиллар орқали қабул қилинади.

Таъкидлаш жоизки, бир неча йиллар давомида энг ёпиқ деб ҳисобланиб келган Мудофаа вазирлиги 2017 йилда mudofaa.uz расмий веб-сайтини, 2018 йилда эса Telegram’даги канали ҳамда Facebook’да «Мудофаа Пресс» расмий саҳифасини ишга туширган эди.