Ўзбекистон Президенти Шавкат Мирзиёев 10 август куни Тошкент шаҳар Шайхонтоҳур тумани фаоллари билан учрашган эди. Учрашув давомида Давлат раҳбари ҳар ким, нима иш қилмасин, ўша ишга худди ўзи, ўз уйи учун қилаётгандек киришса, шундагина Ватан обод бўлишини таъкидлади.
Президентнинг таъкидлашича, бу жараёнда томошабин бўлиб турганлар — «қип-қизил хиёнатчи»лардир.Жорий йилда республика бўйича прогнозга нисбатан жами 8,1 триллион сўм солиқ йиғилиб, шундан 6 триллион сўми маҳаллий бюджетлар ихтиёрида қолдирилади. Тарихда бўлмаган бундай нарса.Тошкент шаҳрида эса прогнозга нисбатан 2 триллион сўм кўп солиқ тушиб, маҳаллий бюджетга 1,5 триллион сўм қолади. Бу 2017 йилга нисбатан 10 баробар кўп. Маҳаллий бюджетга қанча кўп пул тушса, халқимизга шунча ишчи жой яратамиз, мактаб қурамиз, болалар боғчаси қурамиз, йўл қурамиз, боғ қурамиз.
Мана бугун қанча нарсаларни келишиб келдик. Худди ўзимизнинг уйимизга ўхшаб ҳаракат қилсак, мана шунда Ватанимиз обод бўлади. Бу меники эмас, деб ҳаракат қиладиган бўлсак, томошабин бўлиб турсак, қип-қизил хиёнатчи бўламиз. Ва ўзимизга эмас, неварамизга хиёнат қилган бўламиз. Бўлаверади деб юраверсак, эртага нима бўлади ишларимиз?
Менга берилган маълумот бўйича, Шайхонтоҳур туманига 11 мингта ишчи жойи керак. Лекин бугун биз 20 мингта ишчи жой яратиш бўйича чора-тадбирлар кўрдик. 20 минг! 2018—2019 йилларда 2,147 триллион сўмлик 97 та лойиҳани амалга ошириш бўйича дастур ишлаб чиқдик. Ота-она учун боласи бориб, ишда бўлиб, ўзини бахтини топишдан катта бахт борми ҳозирги замонда?
Шавкат Мирзиёев, Ўзбекистон Президенти
Изоҳ (0)