16 август куни, Ислом Каримов номидаги «Тошкент» халқаро аэропортига «Ўзбекистон ҳаво йўллари» Миллий авиакомпаниясининг Uzbekistan Airways Technics авиакорхонасида техник хизматдан ўтиш учун келган Tajik Air авиакомпаниясининг ҳаво кемаси қўнди. Бу ҳақда МАК матбуот хизмати хабар берди.
Тожикистон авиакомпаниясига тегишли Boeing 757-200 йўловчи самолётининг Тожикистон Республикаси Президентининг Ўзбекистонга расмий ташрифи арафасида учиб келиши рамзий маъно касб этади, дейилади хабарда.
Ушбу ҳаво лайнери Tajik Air авиакомпаниясининг Uzbekistan Airways Technics авиакорхонасида техник хизмат кўрсатилаётган биринчи самолёти эмас. Uzbekistan Airways Technics ва Тожикистон авиакомпанияси ўртасидаги ўзаро манфаатли ҳамкорлик 2016 йилда йўлга қўйилган. Жорий йилнинг январь ойида корхона мутахассислари томонидан тожик авиаташувчисининг Boeing 767 самолётида C-check шаклидаги таъмирлаш ишлари бажарилган.
Таъкидланишича, «Ўзбекистон ҳаво йўллари» Миллий авиакомпаниясининг Uzbekistan Airways Technics авиакорхонаси ғарбда ишлаб чиқарилган самолётларга барча турдаги техник хизмат кўрсатиш ва таъмирлаш ишларини амалга ошириш учун зарур техник база ва малакали кадрларга эга. Авиакорхонанинг салоҳияти самолётларни бўяшдан тортиб, капитал таъмирлашгача бўлган техник хизматнинг мураккаб турларини нафақат МАК авиапарки, балки хорижий компаниялар самолётларига ҳам кўрсатиш имконини беради.
Авиакорхонада ҳар йили Қозоғистоннинг SCAT, Тожикистонниг Tajik Air ва бошқа хорижий авиаташувчилар ҳаво кемаларига хизмат кўрсатилади. Жорий йилнинг охиригача Тожикистоннинг яна бир самолёти техник хизматдан ўтиш учун келтирилиши кутилмоқда, шунингдек, узоқ муддатли ҳамкорлар — Туркман ҳаво йўллари ва бир қатор Россия авиакомпаниялари билан музокаралар олиб борилмоқда.
Изоҳ (0)